Son veciños e veciñas de 25 concellos da provincia, que gozarán de estancias no Gran Talaso Hotel Sanxenxo e no Balneario de Mondariz, en Mondariz-Balneario
Máis de 120 persoas de 25 concellos da provincia desfrutarán esta semana do programa termalismo da Deputación de Pontevedra +Benestar con estadías no Gran Talaso Hotel Sanxenxo e no Balneario de Mondariz, en Mondariz-Balneario. En concreto, son persoas dos concellos de Baiona, Cangas, A Cañiza, Cuntis, A Estrada, Gondomar, O Grove, Lalín, Marín, Meaño, Mos, Nigrán, O Porriño, O Rosal, Poio, Ponte Caldelas, Pontevedra, Portas, Salvaterra de Miño, Sanxenxo, Tomiño, Tui, Vigo, Vilagarcía e Vilanova de Arousa.
En concreto, ata 38 persoas de Cangas, A Cañiza, A Estrada, Gondomar, Mos, Pontevedra, O Porriño, Portas, O Rosal, Salvaterra de Miño, Tomiño, Vigo, Vilagarcía e Vilanova de Arousa desfrutarán de +Benestar no Gran Talaso Hotel Sanxenxo, e outras 84 de Baiona, Cangas, Cuntis, Gondomar, O Grove, Lalín, Marín, Meaño, Nigrán, Poio, Ponte Caldelas, Pontevedra, Portas, O Rosal, Sanxenxo, Tui, Vigo, Vilagarcía e Vilanova de Arousa farano no Balneario de Mondariz.
No marco do programa de termalismo +Benestar serán preto de 2.200 as persoas de máis de 55 anos de 60 concellos da provincia as que desfruten de estancias de seis días e cinco noites en balnearios, talasos ou spas de Sanxenxo, Mondariz, O Grove e Lalín. A Deputación de Pontevedra pretende con esta iniciativa facilitar aos veciños da provincia o acceso a actividades de ocio saudable e envellecemento activo en establecementos hostaleiros e , ao mesmo tempo, dinamizar a economía da provincia, impulsando a creación e o mantemento de postos de traballo no sector turístico durante os períodos de menor actividade.
O organismo provincial subvenciona un total de 2.097 das prazas, que son de réxime xeral, con 100 €, e outras 30, de réxime especial, están subvencionadas con 400 €, e os usuarios deben facerse cargo da cantidade restante. Ademais da estadía, o paquete comprende a pensión completa, o uso do spa, do balneario ou doutras instalacións de características similares un mínimo de dúas horas ao día, e o traslado de ida e volta en autobús aos establecementos desde os concellos de Vigo ou Pontevedra.
