As estancias programadas este 14 e 15 de febreiro levarán a familias de 15 concellos ao Hotel Bahía de Baiona, ao Carlos I de Silgar de Sanxenxo, ao Alda Carril, Alda Castelao e Pazo O Rial de Vilagarcía de Arousa e ao Hotel Coia de Vigo
A Deputación de Pontevedra programa esta fin de semana novas saídas do programa Lecer en familia, que levarán a 98 persoas de 15 concellos da provincia a seis dos 12 establecementos hoteleiros participantes no programa. O obxectivo desta iniciativa é reforzar os lazos familiares nun ambiente de convivencia financiando estancias de fin de semana en establecementos hoteleiros, das que poden gozar familias con menores ao seu cargo e que residan na provincia de Pontevedra.
20 persoas de Ponte Caldelas, Redondela, Moaña e Vigo, pasarán a fin de semana no Hotel Bahía de Baiona mentres que outras 40 de Mos, Pontevedra, O Porriño, Redondela, Vigo e Vilagarcía o farán no Hotel Carlos I de Silgar, en Sanxenxo. Tamén participarán 3 persoas de Poio, cunha estancia no Hotel Alda Carril, en Vilagarcía; ata o Hotel Pazo O Rial chegarán 21 persoas de A Guarda, Baiona e Vigo e 10 persoas de Covelo, Mos e Tui ao Alda Castelao, ambos tamén en Vilagarcía. Finalmente, 4 persoas de Ribadumia pasarán a fin de semana no Hotel Coia de Vigo.
En total, van participar en Lecer en Familia preto de 3.000 persoas de 52 concellos da provincia, que asistirán a 12 estabelecementos entre os que se inclúen spas, balneario, talasos e hoteis tanto de zonas rurais como urbanas. En réxime de media pensión, tamén realizarán actividades socioculturais (cunha ampla variedade a escoller asociada a cada estabelecemento) ou accederán aos circuítos termais dos que dispoñan nas súas instalacións. Ademais de potenciar a calidade de vida das familias, o programa tamén busca impulsar o sector turístico da provincia de Pontevedra.
Das preto de 3.000 prazas, 50 correspóndense cun réxime especial e son subvencionadas ao 100%. As de réxime xeral están subvencionadas con 60 € para maiores de 12 anos, 30 € para nenos de 3 a 12 anos, e ao 100% para menores de 3 anos. As estadías realizaranse en temporada baixa (entre xaneiro e marzo), con estancias dunha noite en fins de semana, períodos non lectivos ou vésperas de festivo.
