Os documentais “Prefiro condenarme”, de Margarita Ledo, e “Salvaxe, salvaxe”, de Emilio Fonseca, porán o broche de ouro a este ciclo, no que a institución provincial colabora coa Academia Galega do Audiovisual
O Ciclo Mestre Mateo percorreu no 2025 os concellos de Marín, Salvaterra de Miño, Vilanova de Arousa e Covelo
Covelo acolle esta semana as dúas últimas citas co mellor audiovisual galego da man do Ciclo Mestre Mateo, unha iniciativa impulsada pola Deputación de Pontevedra e a Academia Galega do Audiovisual para achegar as longametraxes de ficción e documentais finalistas dos premios do audiovisual galego aos concellos da provincia. As dúas sesións programadas o mércores 10 e o venres 12 de decembro terán lugar no Auditorio municipal e servirán para poñer o broche de ouro a este ciclo que no 2025 percorreu os concellos de Marín, Salvaterra de Miño, Vilanova de Arousa e Covelo.
O mércores 10 de decembro ás 18:00 horas proxectarase o documental “Prefiro condenarme”, de Margarita Ledo. Esta cinta conta a historia das mil caras de Sagrario, mariscadora na ría de Ferrol, cun ambiente familiar en perpetuo desasosego e un xuízo por adúltera aos 33 anos. Sagrario colócase fóra da regra e ao desobedecer reivindica o desexo como lei non escrita, así como a igualdade coas de “arriba” ás que ninguén critica.
Pola súa banda, o venres 12 ás 20:30 horas terá lugar a última proxección do Ciclo Mestre Mateo con “Salvaxe, salvaxe”, de Emilio Fonseca. O documental rastrexa imaxes e ausencias do lobo ibérico nos montes de Galicia e do norte de Portugal, atravesa un conto cargado de mitoloxía popular e enfróntase a unha historia audiovisual feita de imaxes-simulacro do natural e salvaxe. Este ensaio fílmico en realidade é un anti-documental de natureza: nel aparecen lobos que devolven a mirada a cámara aterrorizados e humanos que saben ouvear.
