O presidente provincial, Luis Menor, xunto ao conselleiro do Medio Rural en funcións, José González, e ao alcalde de Xinzo, Amador Díaz, detallaron en Xinzo as obras que se executarán nunha vía fundamental para dar saída á produción agroalimentaria da bisbarra
Con esta nova actuación demóstrase unha vez máis que tanto a Deputación como a Xunta “estamos comprometidos con facer desta comarca un referente do sector agrícola galego”, sinalou Luis Menor
A actuación conxunta das tres administracións implicadas permitirá levar a cabo o ensanche, a pavimentación e a instalación dunha nova rede de sumidoiros, así como a sinalización horizontal e vertical, cun investimento de 320.000 euros, achegados por Medio Rural (220.000) e a Deputación (100.000)
O presidente da Deputación de Ourense, Luis Menor, xunto ao conselleiro do Medio Rural en funcións, José González; e ao alcalde de Xinzo de Limia, Amador Díaz, visitaron hoxe a zona das futuras obras de acondicionamento e mellora do Camiño da Armada en Xinzo, unha vía fundamental para dar saída á produción agroalimentaria da bisbarra, en especial no que atinxe ao cereal.
Luis Menor lembrou que trala súa toma de posesión como presidente provincial, unha das súas primeiras visitas foi ao municipio de Xinzo de Limia onde se comprometeu a colaborar na mellora desta importante vía. Dito compromiso xa se materializou na primeira modificación de crédito aprobada no pasado mes de outubro cunha achega de 100.000 euros. “Demos solución en tempo récord a unha das demandas máis urxentes e necesarias que se nos trasladaron por parte do goberno municipal limiao”, recoñeceu o presidente provincial.
Con esta nova actuación demostramos unha vez máis que tanto a Deputación como a Xunta de Galicia “estamos comprometidos con facer desta comarca un referente do sector agrícola galego”, sinalou Luis Menor. Resaltou, así mesmo, que o Concello de Xinzo recibirá neste ano da Deputación de Ourense máis de 348.000 euros ao abeiro do Plan CooperOU.
Pola súa parte, o alcalde de Xinzo agradeceu “enormemente” a implicación da Xunta e da Deputación pola súa achega económica para arranxar esta pista. As obras comezarán a vindeira semana e tratarase de que rematen á maior brevidade posible dado o estado actual da vía, para facilitar así o tránsito dos vehículos agrícolas e pesados, tal e como anunciou o conselleiro do Medio Rural en funcións.
Estas obras de mellora permitirán rexenerar e ampliar o firme nun tramo de algo máis dun quilómetro deste camiño, mediante unha serie de actuacións, como o ensanche, a pavimentación e a instalación dunha nova rede de sumidoiros, así como de sinalización horizontal e vertical.
O orzamento das obras ascende a 320.000 euros, dos cales a Deputación achega 100.000 euros e a Consellería do Medio Rural 220.000 euros. O Concello, pola súa parte, porá a disposición os terreos e asumirá tamén a explotación e o mantemento das actuacións programadas.
