O presidente provincial, Luis Menor, mantivo unha reunión coa alcaldesa Ana Villarino, na que se abordaron diversos asuntos de colaboración institucional, “ademáis de informar de primeira man sobre o Plan CooperOU e as implicacións concretas no municipio de Oímbra”
A rexedora de Oímbra valora “moi positivamente esta reunión para sacar adiante proxectos moi importantes e estratéxicos para o noso municipio”
O presidente da Deputación, Luis Menor, continúa avanzando nas súas roldas de contactos cos alcaldes e alcaldesas de toda a provincia. Esta mesma mañá, mantivo un encontro de traballo coa rexedora de Oímbra, Ana Villarino, onde acordaron diversos asuntos de colaboración institucional, “ademais de informar de primeira man sobre o Plan CooperOU e as implicacións concretas neste municipio”, explicou Luis Menor.
Así, entre os asuntos tratados está a colaboración coa Xunta de Galicia para a humanización da estrada provincial OU-1011 (que comunica Oímbra con Verín), a través da construción dunha senda peonil e ciclista (mixta), que contribuirá a mellorar a seguridade viaria nesta zona do municipio, dotando a Oímbra dunha mobilidade sostible e segura. Tamén se abordou a posibilidade de cofinanciamento obras para a construción dun proxecto piloto de vivendas de protección neste termo municipal, tamén en conxunto co Goberno Autonómico. De feito, a alcaldesa valorou “moi positivamente esta reunión para sacar adiante proxectos moi importantes e estratéxicos para o noso municipio.
