A deputada de Infraestruturas, Belén Cachafeiro, visitou esta actuación na que se están a investir 40.000 euros nun tramo de máis de 1,2 quilómetros
A deputada de Infraestruturas Públicas, Belén Cachafeiro, supervisou en Catoira as obras que a Deputación de Pontevedra está a acometer na estrada provincial EP-8001 Caldas-Carracedo-Catoira onde está a investir 40.000 euros. Estes traballos están incluídos no lote 1 do servizo de conservación integral da rede viaria da institución provincial, no que se están a investir preto de 10 millóns de euros.
Belén Cachafeiro sinalou que a actuación que se está a executar nesta estrada provincial abrangue unha lonxitude de 1.250 metros entre os puntos quilométricos 3+000 e o 4+250 e nunha superficie de 11.000 metros cadrados. O principal obxectivo, tal e como detallou a deputada, consiste na realización de operacións localizadas de mantemento das características superficiais do firme, da súa capacidade portante e de reposición da sinalización horizontal e drenaxe afectados. Neste eido estase a aplicar microaglomerado en frío sobre pavimento bituminoso, incluíndo a preparación con varrido da superficie.
Os traballos de conservación de firme na estrada EP-8001 son, tal e como recordou a deputada, só unha das actuacións que a Deputación está a executar nas vías provinciais que atravesan esta contorna ao abeiro do lote 1 do servizo de conservación integral da rede viaria da institución provincial. “O noso obxectivo e manter os 1.700 quilómetros de estradas provinciais en óptimo estado de conservación e estamos a investir recursos como nunca antes se fixera para que estas vías, indispensables na vertebración do noso territorio, estean nas mellores condicións posibles”, remarcou Belén CAchafeiro.
