A liña de axudas ascende a 200.000 euros e as entidades poderán recibir ata 7.000 euros para impulsar actividades de sensibilización, formación e prevención así como de atención a vítimas de violencia machista, entre outras
A Deputación ultima os días para que entidades sen ánimo de lucro soliciten as axudas para promover a igualdade e loitar contra a violencia de xénero na provincia. Trátase dunha liña de axudas que ascende a 200.000 euros e as entidades poderán recibir ata 7.000 euros para impulsar actividades de sensibilización, formación e prevención así como de atención a vítimas de violencia machista, entre outras. As entidades interesadas teñen ata o 17 de febreiro para presentar a solicitude e achegar a documentación requirida nas bases da convocatoria.
Con estes recursos provinciais, ademais da sensibilización e atención ás vítimas, as entidades tamén poderán impulsar programas destinados a mulleres vulnerables, proxectos e actividades para fomentar a igualdade, iniciativas encamiñadas a mellorar a formación, o emprendemento e a inserción laboral das mulleres, accións dirixidas a crear redes e servizos que favorezan a conciliación e campañas de difusión en materia de igualdade.
Xunto con esta liña de axudas, que ascende aos 200.000 euros, a Deputación ten tamén operativa outra dirixida aos concellos de menos de 20.000 habitantes, por valor de 260.000 euros. Neste caso, os concellos, que se beneficiarán de contías que ascenden a un máximo de 6.000 euros, teñen de prazo ata o 27 de febreiro e con estes recursos poderán impulsar actividades de sensibilización, formación e prevención da violencia machista; proxectos para mellorar a atención integral ás vítimas de violencia de xénero, aos seus fillos e persoas dependentes ao seu cargo; actividades para mellorar a formación e a orientación para o emprendemento e inserción laboral das mulleres e campañas de difusión e sensibilización en materia de igualdade. Tamén para elaborar plans de igualdade, proxectos e iniciativas xurdidas dos acordos das mesas locais contra a violencia de xénero, crear redes de apoio para fomentar a corresponsabilidade e para contratar persoal empregado público especialista en materia de igualdade.
