Os voceiros dos grupos políticos acordaron por unanimidade que a Deputación se adhira ás declaracións da FEMP (“15 de octubre, Día Internacional de las Mujeres Rurales”) e da FEGAMP (“20 de novembro, Día Mundial da Infancia 2024”)
A Deputación vén de ratificar a súa adhesión a senllas declaracións institucionais: á da FEMP titulada “15 de octubre, Día Internacional de las Mujeres Rurales”; e á da FEGAMP titulada “20 de novembro, Día Mundial da Infancia 2024”.
Este acordo por unanimidade adoptouse en xunta de portavoces, na que participaron o presidente provincial, Luis Menor Pérez, presidente tamén da Xunta de portavoces; Ana Patricia Torres Madureira, portavoz do grupo provincial do PP; Álvaro Vila Araujo, portavoz do grupo provincial do PS de G-PSOE; Bernardo Varela López, portavoz do grupo provincial do BNG; e Rafael Martínez Cachafeiro, portavoz do grupo provincial de DO. O secretario xeral da Deputación, Juan Marquina Fuentes, foi o responsable de dar fe do acto.
Día Mundial da Infancia
O texto proposto pola FEGAMP promove que o Día da Infancia sirva para reivindicar e focalizar as accións de protección fronte á violencia cara a prevención, e involucrando como axentes activos na súa propia protección aos propios, nenos, nenas e adolescentes.
Así, proponse a realización do Artigo 19 da Convención sobre os Dereitos do Neno, co compromiso de impulsar todas as medidas lexislativas, administrativas, sociais e educativas apropiadas para protexer á infancia contra toda forma de prexuízo ou abuso físico ou mental, descoido ou trato neglixente, malos tratos ou explotación, incluído o abuso sexual. Tamén contempla avanzar na posta en marcha a nivel local da Lei Orgánica 8/2021, de 4 de xuño, de protección integral á infancia e a adolescencia fronte á violencia. O compromiso abrangue sensibilizar, formar, establecer espazos comunitarios, involucrar a nenos, nenas e adolescentes, familias e coidadores e cidadanía en xeral na prevención da violencia. Tamén se impulsará a realización de actividades deportivas, culturais, educativas, de lecer e tempo libre, dirixidas á infancia, asegurando contar nelas coas políticas de salvagarda axeitadas. A declaración recolle tamén a seguridade de que os profesionais de servizos sociais, infancia, deportes, educación, saúde, corpos e forzas de seguridade locais, cultura, etc., realicen accións coa infancia, nas cales poidan detectar posibles casos de risco de violencia e contar coa formación e ferramentas adecuadas para abordar estes posibles casos.
O texto asegurará tamén que os nenos, nenas e adolescentes, reciban información e formación para autoprotexerse ante posibles casos de violencia e que se lles teña en conta á hora de aportar propostas vinculadas coa prevención da violencia. Neste senso, proveerase ás familias, pais, nais e coidadores, ferramentas e apoio en diferentes etapas da crianza, para o exercicio das súas funcións parentais. Por último, realizaranse campañas dirixidas á poboación local que contribúan a superar a visión social permisiva ante certos tipos de violencias contra a infancia.
Mulleres Rurais
No que atinxe á declaración institucional con motivo do Día das Mulleres Rurais, o texto da FEMP recolle o compromiso de promover políticas que faciliten o acceso en igualdade a recursos e servizos para as mulleres rurais, asegurando a súa participación en pé de igualdade na vida económica; e estimular o equilibrio nos usos do tempo entre as mulleres e homes. Tamén contempla o compromiso de realizar iniciativas de emprendemento e apoiar as que fomenten a educación e formación profesional das mulleres no ámbito rural, garantindo que poidan liderar e beneficiarse de innovacións na agricultura e outros sectores rurais; garantir desde a Administración Pública os servizos de atención sanitaria, educación e protección contra a violencia de xénero, colaborando con organizacións non gobernamentais e o sector privado, para dar voz ás necesidades específicas das mulleres rurais nestes servizos. Por último, o texto da declaración institucional contempla promocionar programas de capacitación que permitan o acceso ás novas tecnoloxías, así como, facilitar as ferramentas e o apoio á información e a formación que facilite a participación no mundo dixital das mulleres no mundo rural.
