Un total de 350 mulleres de 20 entidades comezarán cursos de poda, ximnasia hipopresiva, teatro, alfabetización dixital, risoterapia, taichi, artesanía ou pilates, entre outros
Un total de 350 mulleres de asociacións de 14 concellos da provincia comezan a próxima semana 20 novas accións formativas enmarcadas no programa “Conectadas” da Deputación de Pontevedra. Esta iniciativa ten como principal obxectivo potenciar a promoción das mulleres a través de accións formativas que este ano se desenvolverán en 53 concellos e contarán coa participación de máis de 4.000 usuarias.
O luns 25 darán comezo catro accións. Doce mulleres da Asociación de Veciños San Mamede de Torroso en Mos iniciarán un curso de poda e tarefas do campo desde a sustentabilidade; 18 mulleres da Asociación Cultural Deportiva Saliceta de Salceda de Caselas un de ximnasia hipopresiva; 20 integrantes da Asociacón de Mulleres Rurais “Mar e Agro” de Bueu outro de teatro; e 25 mulleres da Asociación de Mulleres Féminas en Acción de Vilanova de Arousa outro de pilates.
O martes 19 será a quenda de dez novos obradoiros. Neste caso, 23 mulleres da Asociación Española Contra el Cáncer de Bueu comezarán o curso “Coidar coidándonos”; 16 persoas da Asociación de veciños de Corrigatos de Moraña e outras 16 da Asociación de Veciños de Santa Cristina de Cobres o de “Alfabetización dixital”; 25 integrantes da Asociación de veciños Nosa Terra de Pereiras de Mos iniciarán unha actividade de “Ximnasia hipopresiva”; 22 mulleres da Asociación Española Contra el Cáncer de Mos comezarán o curso de Risoterapia; 20 persoas da Asociación Cultural Candelas de Portas o de “Taichi”; 16 mulleres da Asociación de Mulleres Rurais de Matalobos na Estrada e outras 12 da Casa Santa María de la Esperanza Esclavas de la Virgen Dolorosa o de “Pilates”; e 14 persoas da Asociación de veciños Barrio de Saramagoso de Redondela iniciarán unha acción formativa sobre pintura.
O mércores 14 mulleres da Asociación de Mulleres Rurais “Castro Valente” da Estrada comezarán un curso de ioga e outras 12 da Sociedade Cultural do Viso en Redondela unha acción formativa de artesanía en coiro. Pola súa banda o xoves comezarán o seu curso de pintura 15 mulleres da Asociación Santa Isabel de Silleda.
Finalmente, o sábado 30 de setembro comezarán as súas accións formativas tres asociacións da provincia. Quince mulleres da Asociación O Abeiro de Marín e outras 24 da AAVV Cultural e Deportiva de Lourido, en Poio, iniciaranse no sendeirismo. Ademais, outras 14 mulleres da Asociación Amas de Casa Témporas de Agolada comezarán un curso para aprender a realizar artesanía en coiro.
Este ano participan en “Conectadas” 219 entidades de 53 concellos da provincia. Os colectivos puideron escoller entre 30 obradoiros ofertados dentro de cinco bloques temáticos: “Emprende, iniciativas sostibles para o emprego”, “ExpresARTE”, “Conéctate”, “Sementa sostibilidade” e “O teu momento. Coidado e benestar”. Todas as accións formativas inclúen, de forma transversal nos seus contidos, o tratamento da igualdade entre homes e mulleres e teñen unha duración de 35 horas.
