Despedida á pasante salvadoreña Nancy Evelyn

A presidenta provincial, Carmela Silva, ofreceu unha cálida despedida a Nancy Evelyn Aparicio, pasante salvadoreña do “XVII Curso de Pasantías para Alumnos Municipalistas Iberoamericanos 2022” da Organización Iberoamericana de Cooperación Intermunicipal (OICI). Durante a súa estadía a pasante puido extraer coñecemento do traballo que se leva a cabo por parte da Deputación en eidos como a xestión turística e cultural así como nas políticas de igualdade para poder aplicalo nos seus proxectos no Salvador. “Encantounos coñecerte e terte aquí. Nótase que es unha muller intelixente e as mulleres intelixentes son as que cambian o mundo”, asegurou Carmela Silva, quen agasallou á pasante cunha Menina de Sargadelos, unha obra “de referencia da igualdade”. Pola súa banda, Nancy Evelyn Aparicio amosouse “contenta polo recibimento destes días” e fixo un recoñecemento ao labor que leva a cabo a Deputación e o seu persoal. Antes de despedirse ambas subliñaron a necesidade de seguir en contacto “para poder manter a relación”.