Estas actividades lúdicas, formativas e de convivencia comezarán o vindeiro sábado, 31 de maio, no Concello de Fornelos de Montes, despois de que preto de 4.000 persoas desfrutaran delas no 2024
Despois do éxito rexistrado no 2024, o presidente da Deputación de Pontevedra, Luis López, anunciou hoxe a posta en marcha da segunda edición das xornadas +Convivir, que chegarán a 13 concellos da provincia entre maio e novembro deste ano. “Son unhas xornadas multitudinarias dirixidas ao movemento asociativo de Pontevedra -explicou López- coas que queremos demostrar, unha vez máis, que estamos ao seu carón porque xuntos, entre todos, é como se constrúe esta provincia”.
O pasado ano case 4.000 persoas desfrutaron das sete citas celebradas e, neste 2025, +Convivir comezará o vindeiro sábado 31 de maio na Casa Cultural San Adrián de Calvos, en Fornelos de Montes. A continuación, e ata o mes de novembro, está previsto organizar xornadas en Redondela, Salceda de Caselas, A Lama, Baiona, Rodeiro, Gondomar, Pontevedra, Ribadumia, Bueu, Oia, Barro e Tui.
Serán actividades de carácter eminentemente lúdico pero tamén formativo, nas que os asistentes poderán desfrutar de cursos de primeiros auxilios, de risoterapia, nutrición, ximnasia, clases de zumba ou bailes de salón, entre outros. “Un programa completo para seguir demostrando un ano máis que contamos co movemento veciñal para seguir dinamizando a provincia de Pontevedra”, confirmou o presidente provincial.
