O presidente da Deputación de Pontevedra, Luis López, asistiu na mañá deste sábado ao acto de apertura das Festas da Peregrina. A balconada da Casa Consistorial de Pontevedra acolleu a lectura do pregón das festas, que correu a cargo das xornalistas Susana Pedreira e Diana López, impulsoras do foro “As mulleres que opinan son perigosas” co que a institución provincial colabora todos os anos.
O presidente terá unha destacada presenza no marco das Festas da Peregrina, xa que mañá será o encargado de realizar a ofrenda á Virxe durante a misa oficiada polo arcebispo de Santiago de Compostela, Francisco José Prieto Fernández. Será a segunda vez que asuma esta encomenda, despois de facelo por primeira vez en 2023 só unhas semanas trala súa toma de posesión como presidente da Deputación. O presidente, xunto con practicamente a totalidade do goberno provincial, tamén asistirá o domingo pola tarde á procesión.
