Cada un destes clubs, de todo tipo de disciplinas deportivas recibe un máximo de 3.000 euros para financiar diferentes gastos
O presidente da Deputación de Pontevedra, Luis López, confirmou que a Xunta de Goberno deu luz verde ao reparto de 30.000 euros entre 22 clubs deportivos da comarca do Morrazo que participan en competicións federadas de ámbito inferior ao estatal. “Somos a provincia do deporte, e para seguir séndoo temos a obriga de apoiar aos nosos deportistas e clubs, que levan con orgullo o nome da nosa provincia alá onde compiten”, asegurou López.
Cada un destes clubs recibe un máximo de 3.000 euros e son de todo tipo de disciplinas deportivas: fútbol, balonmán, ciclismo, padel, rugby, artes marciais, atletismo, montañismo, caza, esgrima, boxeo ou, entre outros, patinaxe. As axudas permitiranlle sufragar gastos federativos, de competición e adestramento, de persoal, de material deportivo ou gastos sanitarios. En total, no conxunto da provincia distribuíronse un total de 600.000 euros.
No que respecta á comarca do Morrazo, beneficiaranse destas axudas dous clubs de Bueu, que contarán cun total de 2.091 euros; 11 de Cangas, con 16.195 euros, e outros nove de Moaña, que recibirán 13.290 euros.
