O presidente provincial, xunto coa vicepresidenta e responsable de deporte, sinala investimentos novidosos do DEPOVAN, as axudas de récord a deportistas ou melloras en instalacións municipais e das entidades como mostra do apoio da Deputación ao deporte
O mérito invisible dos deportistas foi o lema dunha gala que serviu para homenaxear ao atleta Manuel Rosales, un referente na práctica do deporte como hábito de vida saudable, no fomento do deporte de base e da constancia e o traballo diario
“O deporte é unha fiestra que proxecta as Rías Baixas como o que é: inigualable en beleza e incomparable para o deporte. Demostramos que o deporte é riqueza, emprego, turismo, territorio e o que nos fai transcender”, afirma López
O presidente da Deputación de Pontevedra, Luis López, destaca os catro piares sobre os que se sustenta a provincia do deporte. “Deportistas, clubs, infraestruturas e eventos son as catro columnas que grazas ao labor de todos os que estamos aquí son cada día máis altas e robustas”, afirmou o mandatario provincial para pechar a Gala do Deporte deste ano 2025 que a Deputación organizou no módulo de atletismo do IFEVI, en Vigo, dedicada ao “mérito invisible” dos deportistas e de todo o tecido deportivo da provincia personalizada na figura do laureado e veterano atleta Manuel Rosales, o deportista homenaxeado na gala deste ano.
“Manuel Rosales é a provincia do deporte porque encarna á perfección o lema desta gala: o mérito invisible e o mérito visible. Falo de mérito visible porque non hai máis que buscar o nome de Manuel Rosales e ver o seu infinito palmarés, con máis de 48 medallas nas súas vitrinas. Pero aínda máis mérito teñen os seus logros invisibles: é un exemplo de que o deporte é saúde, non hai máis que velo participando en carreiras aos seus 90 anos, é un dos grandes nomes propios do deporte aquí –na súa casa, Marín, ten unha carreira co seu nome—, en Galicia e en toda España e é un pioneiro no relanzamento de clubs de atletismo e nesa idea, compartida por todos, de converter esta provincia no gran recinto deportivo ao aire libre”, ilustrou López para poñer en valor o legado do deportista.
A gala, conducida pola directora de deportes da Deputación, Xisela Aranda e o xornalista Armando Álvarez, comezou coa proxección dun vídeo que pon o foco no mérito invisible do deporte pontevedrés. Unha cerimonia que seguiu coa benvida aos asistentes por parte da vicepresidenta e responsable de Deportes da Deputación, Luisa Sánchez, que reivindicou o traballo dos deportistas locais independentemente dos resultados. “Sempre nos din que hai que buscar a excelencia e triunfar, pero por que non se pode fallar? É obrigatorio conseguir a vitoria? É malo non obter unha medalla? Non, non sempre hai gañar e non debemos obsesionarvos co éxito”, defendeu a vicepresidenta para engadir que “o deporte debe transmitir uns valores á sociedade e eses valores non poden obrigar a ninguén a ser o mellor. Eses valores deben ensinar o camiño para superarse uno mesmo. Pero non necesariamente para superar aos demais. Cada persoa ten o seu talento e o explota ao máximo das súas propias posibilidades”.
Despois do discurso de Luisa Sánchez, a gala continuou cunha entrevista a figuras do deporte da provincia como a ximnasta Melania Rodríguez ou a tiradora Judith Rodríguez. A exhibición de taekwondo a cargo do club Hebe deu paso ao vídeo de “O Noso Club”, o programa impulsado pola Deputación para crear unha canteira provincial de deportistas de distintas disciplinas no que técnicos de distintas modalidades deportivas debateron sobre os beneficios deste plan. A gala rematou cunha exhibición de flatland, unha modalidade de ciclismo BMX que precedeu á homenaxe a Manuel Rosales, quen recibiu un agasallo por parte do presidente Luis López.
“Sexa cal sexa a meta, sempre teredes na Deputación ao mellor compañeiro de equipo”, deixou claro o mandatario provincial antes de detallar a achega da Deputación en cada un dos catro piares que sosteñen a provincia do deporte. Un compromiso que comeza co apoio aos deportistas a través dunhas axudas de récord a 436 deportistas de alto nivel ou a creación dunha canteira provincial como a do Noso Club ou a academia de pilotos de +Talento Motor.
A colaboración cos clubs é outro sinal da aposta do goberno de Luis López polo deporte que se plasma nun apoio directo a máis de 700 entidades ou na recuperación de eventos que vertebran a provincia como a Copa Deputación ou colaboracións directas como o programa DEPOVAN, que reparte 600.000 euros entre as entidades deportivas da provincia para a adquisición de vehículos.
As infraestruturas están a experimentar unha revolución da man da Deputación tanto a través das tres convocatorias do Plan Extraordinario de Infraestruturas Deportivas que está a mobilizar 20 millóns de euros nos concellos da provincia, como o investimento de 13,3M€ na reforma de Balaídos ou a mellora de pavillóns como Príncipe Felipe en Pontevedra. Neste punto, destacou Luis López o lanzamento do primeiro Plan Provincia do Deporte – Prodeporte para mellorar as instalacións das entidades deportivas dotadas con 1,8M€.
O cuarto pilar son os eventos deportivos. A provincia acolle cada fin de semana competicións de toda clase e de todas as categorías, moitos deles de repercusión internacional como mundiais de vela, etapas de La Vuelta ou do Gran Camiño, probas de motociclismo, partidos das seleccións nacionais de balonmán ou fútbol, series mundiais de tríatlon ou circuítos internacionais de pádel. Apostas que se combinan con iniciativas como as axudas ao turismo deportivo. “O deporte é unha fiestra que proxecta as Rías Baixas como o que é: inigualable en beleza e incomparable para o deporte. Demostramos que o deporte é riqueza, emprego, turismo, territorio e o que nos fai transcender”, afirmou Luis López.
“Os deportistas sodes a alma desta provincia do deporte, non podemos máis que dicirvos grazas por facernos máis grandes dentro e fóra do territorio. O mérito poder ser invisible, pero o que ninguén pode ocultar é que sodes protagonistas desta provincia”, rematou o presidente da Deputación.
