O presidente provincial presenta o proxecto para a reposición do firme e mellora dos servizos para un treito de 5,5 quilómetros entre as localidades de Xil, As Covas e Barrantes que está financiado ao 100 % pola Deputación
O presidente da Deputación de Pontevedra, Luis López, salienta un investimento de preto de 1,3 millóns de euros, financiado ao 100 % polo organismo provincial, para a mellora da seguridade viaria da estrada provincial EP-9302, que une os concellos de Ribadumia e Meaño. Acompañado polos alcaldes David Castro e Carlos Vieitez, o mandatario provincial presentou este mércores o proxecto para mellorar o firme e os servizos dun treito de 5,5 quilómetros desta estrada que une as localidades de Xil, As Covas e Barrantes.
“Neste comezo do 2025 seguimos demostrando que o goberno da Deputación cumpre coas súas obrigas en materia de Infraestruturas, cunha partida orzamentaria que medra en 8M€, ata un total de 24M€, cumpre co seu compromiso de colaboración leal e sólida cos concellos e cumpre coa súa máxima de estar ao carón da veciñanza, mellorando servizos e infraestruturas, vivan onde vivan”, afirmou o presidente López despois de dar a coñecer unha nova actuación de mellora dunha estrada provincial impulsada pola Deputación.
A obra, que ten un prazo de execución de seis meses está valorada en case 1,3M€, consistirá na reposición do firme entre os puntos quilométricos 0+000 e 5+757. E, a maiores, melloraremos os sistemas de drenaxe de augas pluviais e repoñeremos a sinalización vertical e horizontal.
Un proxecto no que, segundo recoñeceu o mandatario provincial, xogaron un papel moi importante os rexedores de Ribadumia e Meaño. “A esta meta so é posible chegar grazas a colaboración con alcaldes como David Castro e Carlos Vieitez, que formulan os proxectos que os veciños lles trasladan. Teñen a capacidade de escoitar, entender e logo trasladarllo a administración, neste caso a Deputación, que estamos aquí para poder atender”, sinalou o titular do goberno provincial.
O compromiso co mantemento e mellora da rede de estradas provinciais é unha “constante” para o goberno provincial. “Pechamos o ano cunha axenda repleta de remate de obras, presentación de proxectos ou sinatura de convenios cos concellos en materia viaria e iniciamos o 2025 do mesmo xeito. O compromiso da Deputación coa modernización das estradas, coa cooperación cos concellos e coa mellora dos servizos para a veciñanza non entende de calendarios e é unha constante”, concluíu o presidente Luis López.
