No marco do XVIII Encontro-Asemblea de Vilas Termais, o presidente provincial e presidente desta sección da FEMP, participou no panel de experiencias que analizou o aproveitamento do termalismo para o desenvolvemento de políticas sociais
Como elemento diferencial das políticas sociais, a Deputación de Ourense aposta por “personalizar o termalismo” creando diferentes modalidades de programas e perseguindo iniciativas públicas orientadas á mellora da saúde física e mental
Luis Menor animou aos asistentes a optar por unha maior cooperación cos balnearios, pero tamén entre os territorios, reivindicando este espazo da FEMP como o “lugar idóneo” para que as políticas sociais de termalismo poidan ser, cada ano, de maior utilidade
O presidente da Deputación de Ourense e presidente da sección de Vilas Termais da FEMP, Luis Menor, interveu hoxe en Vega de Tirados (Salamanca) no panel de experiencias dedicado a como aproveitar o termalismo para o desenvolvemento de políticas sociais.
Neste relatorio, que se enmarca na celebración da XVIII encontro-asemblea de Vilas Termais, o presidente provincial explicou a experiencia da Deputación de Ourense ligada á posta en marcha de programas públicos no ámbito social que empreguen aos balnearios como un recurso.
Neste sentido, Menor explicou que o traballo das entidades locais a prol do termalismo debe realizarse a través de programas “planificados e continuados” que teñan como obxectivo fixar “unha verdadeira e duradeira cooperación público-privada con todo o sector termal”, que integren aos centros termais para o desenvolvemento de políticas sociais.
Os balnearios como recurso e entidades colaboradoras
Nese modelo de colaboración que se formula desde Ourense, Luis Menor lembrou que para o goberno provincial cada un dos centros termais da provincia é “un axente de cooperación público-privada que colabora na xestión da subvención” que a institución concede á veciñanza para fomentar o uso destas instalacións termais.
Desde a Deputación preténdese que os programas termais postos en marcha sexan o “máis accesibles posibles” para a cidadanía e, con esa vocación, apostouse por unha xestión administrativa das axudas 100% online, que se poden realizar en calquera momento do día e que non require ter coñecementos nesta materia grazas á implantación da firma biométrica bocal.
Personalizar o termalismo con programas diferentes
Como elemento diferencial das políticas sociais, a Deputación de Ourense aposta pola “personalizar o termalismo” creando diferentes modalidades de programas e perseguindo iniciativas públicas orientadas á mellora da saúde física e mental. Por elo, cada ano incrementamos o peso das modalidades orientadas aos “colectivos máis vulnerables”, salientou Luis Menor, como o programa contra a soidade non desexada e o de contra o deterioro cognitivo leve dirixidos á poboación local.
Neste sentido, manifestou a súa “especial satisfacción” coa actuación posta en marcha desde a Deputación en colaboración cos servizos sociais de Massanassa para as persoas afectadas pola DANA. Esta iniciativa logrou non só axudar a quen o precisaba senón tamén dar visibilidade aos propios centros termais, de feito, o presidente provincial lembrou que “o maior incremento de accesos á web do balneario no que se realizou esta actuación veu da Comunidade de Valencia”.
Gran impacto económico nos balnearios a través da xestión pública
Mostra do resultado desta política termal, Luis Menor destacou que os balnearios ourensáns abren cada vez máis meses, sendo este ano “o primeiro no que todos os hoteis balnearios da provincia estean abertos en decembro a través de programas sociais”.
Os datos, aportados polo presidente provincial, demostran o éxito da política termal provincial con máis de 26.000 persoas beneficiarias desde o principio do programa de termalismo social, preto de 100.000 pernoitas e máis de 200.000 técnicas termais administradas, máis de 7 millóns de euros de impacto directo nos balnearios, e ao redor do 70% dos solicitantes dos programas da Deputación residen fóra da provincia.
Maior colaboración cos balnearios e entre territorios
Por último, Luis Menor como presidente desta sección, animou aos asistentes a optar por unha maior cooperación cos balnearios, pero tamén entre os territorios, reivindicando este espazo da FEMP como o “lugar idóneo” para que cada ano as políticas sociais de termalismo poidan ser de maior utilidade.
