O presidente da Deputación e da EHTTA abriu cun vídeo a cita organizada polo Comité Científico da asociación europea de cidades termais, acollida nesta edición pola cidade polaca de Ladek -Zdrój
O presidente da Deputación de Ourense e da European Historic Thermal Towns Association (EHTTA), Manuel Baltar, abriu hoxe a celebración da quinta edición do Día Europeo do Patrimonio Termal cun vídeo no que deu a benvida aos asistentes ao evento organizado polo Comité Científico da EHTTA.
A cita, acollida este ano pola cidade polaca de Ladek -Zdrój en formato en liña e presencial, naceu en 2018 para, segundo explicou Manuel Baltar na súa intervención, “mellorar a coñecemento do noso patrimonio termal común e resaltar o seu valor como unha tradición centenaria en toda Europa, perseguindo un maior recoñecemento dos problemas que afectan o futuro deste valioso patrimonio común”.
A primeira edición deste evento remóntase a 2018, Ano Europeo do Patrimonio Cultural, en Budapest. Despois seguiron Spa e Baden-Baden. En 2021, a cidade alemá de Wiesbaden arrincou un ciclo de tres anos ao redor da “paisaxe terapéutica” centrándose no urbanismo termal. Este ano, as conferencias viraron ao redor dos “parques e xardíns”.
No vídeo, gravado en Cabreiroá, Manuel Baltar profundou no que supón o patrimonio termal, un “fenómeno europeo moi particular, que inclúe recursos naturais, culturais e intanxibles. O concepto de patrimonio termal utilízase para promover a saúde e o benestar, desenvolver os nosos destinos e protexer magníficas paisaxes culturais”.
Deténdose precisamente nas características de Cabreiroá, coa súa bouvette modernista e o edificio do hotel deseñados polo icónico arquitecto ourensán Vázquez Gulías, Manuel Baltar sinalou na súa intervención na cita da EHTTA que este é unha “paisaxe terapéutica ao servizo da saúde e o benestar”.
“Estas paisaxes deseñáronse”, explica o presidente da Deputación e da EHTTA, “para mellorar a saúde física e física e mental dos visitantes, ademais de involucrar aos propios veciños nun secular proceso sostible. E hoxe, no contexto de post pandemia, ninguén dubida de que estes espazos son particularmente valiosos”, reivindicou Manuel Baltar ao redor da folla de roteiro coa que a asociación europea de cidades históricas termais quere seguir avanzando no posicionamento global do turismo termal como un recurso socioeconómico de primeiro nivel.
