O presidente provincial, Luis Menor, reuniuse co presidente da Asociación de Empresarios de Valdeorras (AEVA), Carlos Manuel Terán Búa, que asumiu o cargo o pasado mes de xuño tras os oito anos de mandato de Araceli Fernández e coa xerente da entidade, Teresa García. No marco da xornada de traballo en Valdeorras, Menor mantivo un encontro coa nova directiva desta entidade que representa ao sector comercial, reafirmando o compromiso colaborador da Deputación coas súas iniciativas.
Menor puxo en valor o papel destacado desta asociación no tecido económico valdeorrés e o “dinamismo e a representación” da propia comarca e deulle os parabéns a Terán Búa polo seu traballo á fronte do cargo. O presidente provincial engadiu que dende a Deputación “promoveremos que máis administracións colaboren para seguir creando emprego e riqueza e aproveitando as potencialidades de Valdeorras”.
Na reunión analizouse toda a actividade que a AEVA leva a cabo na defensa dos intereses dos empresarios da comarca, quedando de manifesto a ampla implantación que ten en Valdeorras, con máis de 200 asociados pertencentes a unha ducia de sectores diferentes, abarcando practicamente todos os ámbitos da actividade empresarial, como son a lousa, o comercio e a hostalería, entre outros.
