A vicepresidenta Luisa Sánchez e delegada de Deportes subliñou que “aprobamos dous Plan Extraordinarios de Infraestruturas Deportivas dotados de 12 millóns de euros cos que impulsamos 180 obras en todos os concellos de menos de 50.000 habitantes da provincia”
“Incrementamos todas as partidas dirixidas ao deporte con respecto ao anterior goberno provincial, algunhas ata un 50% máis”, lembrou Sánchez
“Impulsamos novas liñas de axuda, como as destinadas a bens e servizos ou a adquisicións e adaptacións de furgonetas e vehículos para os desprazamentos dos clubs, dotadas de 420.000 euros”, destacou a vicepresidenta
Luisa Sánchez tamén enxalzou a posta en marcha da cátedra do deporte en colaboración coa Universidade de Vigo e do programa +Talento Motor
O goberno de Luis López converteu Pontevedra nestes dous primeiros anos de mandato, cun investimento de 27,3 millóns de euros, na provincia do deporte. A vicepresidenta da Deputación e delegada de Deportes, Luisa Sánchez, remarcou que “construímos arredor desta premisa innumerables iniciativas para conseguir que así sexa, plans económicos para mellorar infraestruturas das novas vilas e pobos, pero tamén máis recursos que nunca para o deporte e os nosos deportistas”. Neste eido recordou que “aprobamos dous Plans Extraordinarios de Infraestruturas Deportivas, dotados de 12 millóns de euros cos que impulsamos 180 obras en todos os concellos de menos de 50.000 habitantes da provincia” e tamén que “incrementamos todas as partidas dirixidas ao deporte con respecto ao anterior goberno provincial, algunhas ata un 50% máis”.
Axudas ao deporte
Sánchez destacou que se destinaron a clubs deportivos 15 millóns de euros nos dous primeiros anos de mandato, con programas de axudas ao deporte de ámbito estatal que ascenderon aos 2,7 millóns de euros, ou de apoio aos equipos de elite da provincia dotadas de 2,5 millóns de euros. Ademais, dirixíronse 2,3 millóns de euros ao patrocinio de probas deportivas e preto de 2 millóns de euros para axudar a clubs deportivos que compiten no ámbito inferior ao estatal.
Completan as axudas provinciais ao deporte os máis de 1,5 millóns de euros dirixidos nestes dous primeiros anos de mandato do equipo de Luis López na Deputación ao deporte náutico, os preto de 1,4 millóns de euros para a organización de competicións e eventos deportivos e os 1,1 millóns de euros para o deporte de alto nivel. Ademais, máis de 800.000 euros foron investidos nas escolas deportivas da provincia, outros máis de 226.000 euros no programa DepoComparte e 75.000 euros na formación de mulleres no ámbito deportivo.
Novidosos programas
Ao longo destes dous primeiros anos do mandato de Luis López na Deputación de Pontevedra puxéronse en marcha novidosos programas centrados no deporte. Neste eido destacan os 420.000 euros dirixidos a dúas liñas pioneiras como son as axudas de bens e servizos ou a dedicada á adquisición e adaptación de furgonetas e vehículos para os desprazamentos dos clubs deportivos da provincia. A vicepresidenta provincial tamén destacou os 50.000 euros destinados á posta en marcha da cátedra do deporte, en colaboración coa Universidade de Vigo, ou os 50.000 euros para impulsar a integración no deporte a través da Fundación do Celta de Vigo. Tamén puxo en valor os 41.000 euros investidos no programa de impulso da canteira automobilística da provincia +Talento Motor.
