A proba, organizada pola Federación Galega de Piragüismo e o club Piragüismo Ourense co apoio da Deputación, reunirá a 41 clubs galegos e a case 500 deportistas divididos entre as categorías xuvenil, sénior e veterano
A competición servirá de antesala do Campionato de España de Piragüismo, que se celebrará no mes de marzo en Sevilla
A área termal de Barbantes, no concello de Cenlle, será este sábado o escenario do Campionato Galego de Inverno de Piragüismo na modalidade individual K-1 e C-1.
Esta competición, organizada pola Federación Galega de Piragüismo e o club Piragüismo Ourense co apoio da Deputación de Ourense, reunirá a 41 equipos e a uns 500 deportistas divididos entre as categorías xuvenil, sénior e veterano. A cifra de participantes supón un incremento en comparación coa anterior edición.
Esta edición do campionato, a segunda consecutiva celebrada en Barbantes, celebrarase este sábado, 25 de febreiro, a partir das 10,00 horas e terá un percorrido de 5.000 metros para todas as categorías. Esta regata supón a continuación da celebrada o pasado 11 de febreiro na área termal de Barbantes, inscrita tamén no Campionato Galego de Inverno de Piragüismo mais na modalidade K-2 C-2.
