A institución provincial contará o próximo ano con 110.475.000 euros, que supoñen un aumento do 5,11% e 5.375.000 euros máis que con respecto ao vixente exercicio
A cooperación coas entidades locais, que aumenta nun millón de euros, destina 11.415.000 € en transferencias correntes e 7.610.000 € en investimentos
No apartado de iniciativas, o pleno rexeitou a supresión das competencias de seis xulgados comarcais da provincia (Verín, Xinzo de Limia, O Carballiño, Ribadavia, Celanova e Bande) en materia de violencia de xénero, que provoca un grave prexuízo ás vítimas, en especial ás do medio rural.
O Pleno da Deputación de Ourense aprobou hoxe os orzamentos da institución provincial para 2026, os máis altos da súa historia: 110.475.000 euros que supoñen un aumento do 5,11% e 5.375.000 euros máis que con respecto ao vixente exercicio. Un documento económico que mobiliza 19 millóns no marco do Plan CooperOU, un millón máis que neste ano, dividindo o total deste plan en transferencias correntes con 11.415.000 €, e 7.610.000 € en investimentos.
Por capítulos, o apartado segundo de gastos correntes en bens e servizos conta cunha partida de 28,63 millóns, onde destaca a área de Medio Ambiente con 8,6 millóns para a prestación de servizos relacionados co ciclo da auga, tratamento do lixo e zonas verdes.
Neste mesmo capítulo figura unha partida de 4 millóns de euros para Vías e Obras, xunto co parque de maquinaria e cooperación. Destacan tamén Cultura (3,1 M€); Deportes (preto de 1 M€); Benestar (1,2 M€); e Transparencia e Goberno Aberto (3,3 M€), cunha suba importante pola captación de fondos europeos Next Generation para os proxectos de turismo “Ourense, cerca de ti” (1,3 M€); o padrón on-line para os concellos (1,3 M€); e o plan de capacitación dixital (700.000 €).
O capítulo IV, de transferencias correntes, conta con 20,82 M€, un 18,85% do orzamento xeral. Neste capítulo figura o orzamento para o Consorcio contra Incendios e de Salvamento (750.000 €) e mailo Inorde (2,4 M€), que completarán a súa asignación na modificación de crédito de abril; acción social co Servizo de Axuda no Fogar e iniciativas con entidades (2,3 M€, quedando 750.000 para a próxima modificación); fomento para o deporte, que inclúe o Club Ourense Baloncesto (1,1 M€, cantidade que se completará cunha achega de 450.000 tamén en abril); Protección Civil (1,6 M€, dos que a metade irán na próxima modificación); Cultura, que alcanza os 720.000 euros, incluíndo os 250.000 destinados ao OUFF; e a xa mencionada parte correspondente ao Plan CooperOU (11,4 M€).
No capítulo VI, investimentos reais, reflíctese unha partida de 9,80 M€, cun peso do 8,87% sobre o total xeral. Destacan os 4,5 M€ para o mantemento e mellora da rede de estradas provinciais, coa previsión de incrementar esta cantidade na próxima modificación de crédito. Tamén figuran augas e medio ambiente (1,6 M€, quedando dous millóns para abril); Cultura e Deporte (933.000 €); Informática e Transparencia (947.000 €); ou o parque móbil e de maquinaria (máis de medio millón).
No capítulo VII, transferencias de capital, a cantidade é de 8,56 M€, cunha suba do 18,23% e un 7,75 % do orzamento xeral. A meirande parte, como quedou reflectido, está destinada ao plan CooperOU (7,6 M€). Compre apuntar tamén a achega da Deputación aos regantes da Limia para subvencionar a viabilidade financeira do plan de regadío nesta comarca (500.000 €); as melloras de abastecemento de auga, en convenio coa Xunta de Galicia, na ETAP de Melias, en Pereiro de Aguiar; e 200.000 € para o pavillón de deportes de Ribadavia.
Polo que respecta ao capítulo primeiro, de persoal, a partida é de 42 M€, incluíndo 1,2 M€ para a actualización salarial: un 2 % do ano 2025 e outra porcentaxe igual de 2026. Tamén figuran 1,1 M€ polo aumento do persoal laboral supramunicipal destinado fundamentalmente á recollida de lixo, así como tamén a carreira profesional con case 500.000 € anuais.
Cabe apuntar que no marco do debate dos orzamentos acordouse un aumento do Plan CooperOU, na parte súa parte variable, de ata 2 M€ na modificación de crédito de abril, así como aumentar -tamén con cargo á modificación, os fondos do Plan provincial de Vivenda, que pasarían de 500.000 euros a 1,2 millóns.
Bases do plan de cooperación
En consonancia coa aprobación dos orzamentos, o pleno deu o visto bo ás bases do Plan CooperOU, que para 2026 non prevé cambios. Mantense a modificación realizada este ano no referido aos investimentos, de tal xeito que os concellos terán máis flexibilidade á hora de xustificar o xa realizado en calquera proxecto e así evitar que perdan a achega provincial.
En liñas xerais, o programa de cooperación inclúe como criterio de repartición unha parte fixa segundo os habitantes de cada concello (ata 1.000, 5.000, 10.000 e 20.000), con cantidades que oscilan entre os 90.000 e os 120.000 euros, e unha parte variable en base á poboación (que conta nun 50 %); núcleos de poboación (20 %); índice de envellecemento (15 %); e superficie do concello (15 %).
Os concellos poderán destinar o 40 % da achega provincial, “como mínimo”, a investimentos reais, e o 60 % da aportación, como máximo, a gasto corrente ou amortización de débeda. Con carácter excepcional poderase dedicar o 100 % ao programa de gasto corrente e amortización de débeda nos supostos de insuficiencia financeira manifesta, así como incluír actuacións que teñan un importe superior aos fondos provinciais, sempre que o concello complemente o financiamento.
Aprobáronse tamén as bases do Programa Especial de Cooperación ás obras promovidas polo Concello de Ourense, no período 2025-2026, cunha achega provincial de 139.500 €.
Xestión do ciclo da auga e residuos industriais
Na sesión de hoxe aprobouse o programa para 2026 de colaboración da Deputación coas entidades locais para a xestión dos servizos municipais do ciclo da auga, Ademais de modificacións nos prezos do servizo, incorpóranse novas liñas de actuación específicas derivadas do proxecto Ou-Intelixente (PERTE de dixitalización do ciclo da auga), coa instalación de case 65.000 contadores dixitais con telelectura, ou a dixitalización de estacións potabilizadoras de auga (ETAPs) e de depuradoras de augas residuais.
Tamén presentáronse as modificacións necesarias da ordenanza do servizo de xestión de residuos industriais, como paso previo cara unha nova licitación para a posta en marcha do Centro Verde de San Cibrao das Viñas, construído pola Xunta de Galicia e propiedade deste concello.
O servizo abrangue a recepción neste centro de residuos industriais non perigosos e especiais producidos na provincia; así como a recollida “porta a porta” Trátase de poñer a disposición da iniciativa privada unha infraestrutura que facilite a correcta xestión destes residuos por parte de xestores autorizados.
Na orde do día tamén figuraban outros asuntos, como o cambio de data das comisións informativas e do pleno ordinario correspondente ao mes de decembro, debido ás festas de Nadal. As comisións celebraranse o día 11 e o pleno o día 19. Ademais aprobouse a delegación na Deputación de competencias de xestión tributaria dos concellos de Cenlle e Boborás en materia de augas.
Rexeitamento á centralización das competencias de violencia de xénero na cidade
No apartado de iniciativas, o pleno rexeitou a supresión das competencias de seis xulgados comarcais da provincia (Verín, Xinzo de Limia, O Carballiño, Ribadavia, Celanova e Bande) en materia de violencia de xénero, como consecuencia dun Real Decreto polo que se centralizan estas cuestións na capital, causando un grave prexuízo ás vítimas, en especial ás do medio rural.
Así mesmo, manifestaron o seu apoio institucional ao recurso contencioso- administrativo interposto polo Colexio da Avogacía de Ourense ante o Tribunal Supremo contra este decreto, por considerar que os seus argumentos defenden o interese xeral da cidadanía da nosa provincia e a correcta tutela xudicial das vítimas de violencia de xénero.
