A proposta foi acordada en Cracovia por unanimidade durante a Asemblea Xeral desta organización, vicepresidida por Manuel Baltar, que resaltou na súa intervención a necesidade de potenciar os gobernos intermedios para asegurar “unha gobernanza multinivel adecuada e real”
O presidente da Deputación, Manuel Baltar, participou esta tarde de xeito telemático na Asemblea Xeral da European Confederation of Local Intermediate Authorities (CEPLI), entidade da que é vicepresidente. E dentro dos acordos adoptados nos puntos do día desta asemblea, celebrada en Cracovia (Polonia), aprobouse por unanimidade que Ourense será a sede en 2023 da XII Conferencia Política da CEPLI.
Na súa intervención, Baltar avanzou algúns dos puntos que precisamente serán recollidos na declaración da Conferencia Política deste ano, que se celebrará mañá tamén en Cracovia. O presidente da Deputación define como “esenciais” as administracións locais intermedias para mellorar a resiliencia territorial -“con capacidade para anticiparse e reaccionar ante os desafíos”-, expresando a necesidade de potenciar o seu papel para “asegurar unha gobernanza multinivel adecuada e real”.
Manuel Baltar defende a “aposta no territorio polo traballo coordinado entre administracións, institucións e o sector privado” e o impulso ás alianzas europeas, como a propia CEPLI, Partenalia -rede europea de gobernos intermedios da que é presidente- ou a asociación europea de cidades históricas termais (EHTTA), na que acaba de ser reelixido como presidente ata 2026. Tamén analizou como, a través da potenciación dos servizos públicos locais, permítese “unha mellor xestión do risco nos nosos territorios, implementando políticas públicas con eficiencia, dilixencia e creatividade”.
Recoñecemento ao traballo das autoridades locais intermedias na resiliencia territorial
Na Conferencia Política de mañá, a CEPLI demandará a través da declaración conxunta unha chamada ás institucións europeas para obter un maior recoñecemento ao papel desempeñado polas autoridades locais intermedias na construción da resiliencia territorial. Con aspectos vitais, apuntan, como o acceso directo aos fondos europeos, o establecemento de mecanismos estables para o diálogo entre administracións locais e intermedias -asegurando un papel vital no deseño de, por exemplo, os Plans de Recuperación- ou o apoio político e financeiro para implementar plans de acción local sobre a resiliencia territorial.