O vicepresidente da Deputación de Pontevedra, Rafa Domínguez, participou este xoves na presentación da sétima Andaina Ultreia, que este ano se celebrará o domingo 6 de abril unindo as cidades de Tui e Pontevedra a través do Camiño Portugués a Santiago de Compostela. Organizada polo Diario de Pontevedra e a Agrupación Deportiva HQR!, coa colaboración da Deputación, contará con catro distancias de entre 19 e 52 quilómetros, e o prazo de inscrición continúa aberto ata o 23 de marzo, ao prezo de 17 euros no tramo actual (ata o 4 de marzo). A proba ten carácter solidario e recollerase roupa e calzado deportivo que será repartida durante a vindeira Semana Santa no Sáhara en colaboración coa ONG Rally Solidario.
Rafa Domínguez felicitou a agrupación e o xornal pola iniciativa e asegurou que a Ultreia “é un auténtico reto para calquera que participe nela, pero que tamén permite vivir unha xornada na que valores como a convivencia, o compañeirismo e a superación van da man en todo momento, bebendo do espírito de convivencia dos peregrinos na antigüidade”. O vicepresidente lembrou que o deporte é a grande aposta da Deputación pero tamén o carácter simbólico do Camiño como revulsivo turístico para a provincia, “un escenario que atrae a centos de camiñantes, con sendeiros únicos e un espírito diferente: queremos que quen veña viva experiencias 100% Rías Baixas, porque sabemos que cando o fan convértense para sempre en prescritores da provincia”.
