O presidente da Deputación de Ourense, Luis Menor, recibiu esta tarde no Pazo Provincial a unha delegación da plataforma ProCAPD, dando así resposta á petición dun encontro coa presidencia da institución provincial, realizada en días pasados polo propio colectivo.
Xunto á deputada de Política Social, Patricia Torres, e membros da área de Benestar da Deputación, na reunión tamén estiveron presentes o delegado territorial da Xunta en Ourense, Manuel Pardo, e a directora xeral de Persoas con Discapacidade, Begoña Abeijón.
Na convocatoria, os representantes da plataforma expuxeron as súas demandas ante a próxima posta en marcha do novo Centro de Atención a Persoas con Discapacidade de Ourense.
Pola súa banda, os representantes da Xunta de Galicia deron a coñecer os detalles das instalacións e do modelo de xestión que se quere implantar. Entre tanto, o presidente da Deputación destacou que Ourense terá por fin un centro cunhas modernas instalacións que darán resposta ás necesidades das familias das persoas discapacitadas e cunha xestión que tamén vai garantir unha atención de calidade.
