A función, dirixida ao público infantil e familiar e ambientada nas historias da noite de Samaín, terá lugar ás 18:00 horas no Edificio Multiusos e está dirixida ao público infantil e familiar
Vilanova será este martes 31 de outubro a nova parada do ciclo “Tornar ás táboas”, co que a Deputación de Pontevedra está a espallar o teatro por toda a provincia neste último trimestre do ano. Deste xeito, o Edificio Multiusos acollerá, ás 18:00 horas, o espectáculo “Quen dixo medo?”, a cargo da compañía Barafunda, e dirixido para o público infantil e familiar.
Trátase dun espectáculo de animación, movemento e clown ambientado nas historias da noite do Samaín, no que dúas personaxes farán bailar aos nenos e nenas asistentes e xogar a ser auténticos monstros. A través destes xogos musicais, a rapazada aprenderá a relacionarse e a comprender que ser diferente aos demais non é malo. A compañía que protagoniza a función, Barafunda Teatro iniciou a súa traxectoria no 2009 e produce, crea e promove actuacións culturais en torno ao teatro, a música, o clown e os monicreques.
Co ciclo teatral “Tornar ás táboas” a Deputación de Pontevedra vai achegar entre outubro e decembro un total de 49 funcións gratuítas e dirixidas a todos os públicos a outros tantos concellos da provincia de menos de 20.000 habitantes, coa participación de trinta compañías galegas que ofrecerán unha ampla variedade de espectáculos.