Foron varias as reunións mantidas durante estes catro anos, sendo o BNG a única forza que denunciou a falta de responsabilidade política e a inacción do equipo de goberno con todo o que ten a ver co casco histórico.
Ignorar as demandas dos colectivos veciñais do municipio converteuse nun costume irresponsable e nada democrático do actual equipo de goberno. Disto poden dar fe as veciñas e veciños do casco histórico de Viveiro, que sufriron durante estes catro anos a inoperancia de María Loureiro, até o punto de non responder nin a un só escrito da asociación de todos os que levan presentado nas dependencias municipais.
Conservar o patrimonio, mellorar a limpeza e o coidado do entorno, preservar as actividades empresariais e actuar ante os actos vandálicos, son algunhas das demandas do vecindario cuxo obxectivo é revitalizar un casco histórico sumido no abandono.
Demandas básicas comúns a outros concellos, coa diferenza de que en algúns como Ribadeo o goberno actúa, e no de Viveiro a alcaldesa emprega máis enerxías en acusar falsamente ás veciñas e ao BNG, que en gobernar e ofrecer solucións.
“O BNG defendeu sempre e continuará traballando por un Casco Histórico habitable, seguro e limpo, onde desfrutar do noso patrimonio, da nosa gastronomía, das festas, do noso comercio local” afirma Míriam Bermúdez, “un lugar vivo onde poden convivir veciñas, negocios e ocio, coas medidas axeitadas en beneficio de todos”.
