A Xunta de Goberno Local do Concello de Ourense aprobou hoxe 3 expedientes de contratación para avanzar na implantación da Zona de Baixas Emisións Ourense Centro.
Nunha sesión extraordinaria desenvolvida esta mañá, deulle o visto e prace ao expediente para contratar as subministracións e os servizos integrantes das actuacións necesarias para a implantación e xestión dos sistemas de monitorización da calidade do aire e do ruído na Zona de Baixas Emisións Ourense Centro. Tamén aprobou os pregos de cláusulas administrativas particulares e de prescricións técnicas para a adxudicación do contrato e autorizou o gasto, por importe de 774.075,29 euros.
Na mesma reunión, a Xunta de Goberno Local aprobou o expediente para contratar o servizo de deseño e realización dunha campaña de comunicación pública na fase de implantación da dita zona de baixas emisións, así como os pregos de cláusulas administrativas particulares e de prescricións técnicas para adxudicar o contrato, e autorizou o gasto, por importe de 55.142,34 euros.
Ambas actuacións están financiadas parcialmente pola Unión Europea a través do Fondo Europeo de Recuperación Next Generation EU (proxecto Move Ourense II, actuación nº 1: Implantación da Zona de Baixas Emisións Ourense Centro), dentro do Programa de axudas a municipios para a implantación de zonas de baixas emisións e a transformación dixital e sostible do transporte urbano.
Na mesma sesión, a xunta local aprobou recoñecer unha obriga por importe de 6.300 euros, en favor da Xunta de Galicia.
Noutra sesión extraordinaria, que se desenvolveu a mediodía, a Xunta de Goberno Local aprobou o expediente para a contratación do servizo de implantación e xestión da Oficina de Información e Atención Cidadá da Zona de Baixas Emisións Ourense Centro, que tamén será financiado parcialmente pola Unión Europea a través do Fondo Europeo de Recuperación Next Generation EU, dentro do mesmo programa de axudas a municipios. Tamén se autoriza o gasto, por un importe total de 533.368 euros.
