- No ano 2025 un equipo da Área de Prehistoria da Universidade de Santiago, co apoio de persoal do parque, levou a cabo a primeira escavación arqueolóxica sistemática co obxectivo de caracterizar os restos atopados nesta cavidade calcaria, considerada o xacemento da Idade de Bronce con máis restos humanos documentados en Galicia
- A actividade está aberta ao público en xeral, ata completar o aforo do centro de visitantes, e enmárcase no programa de divulgación científica nos parques naturais
A Xunta de Galicia organiza este sábado unha xornada divulgativa no centro de visitantes do Parque Natural da Serra da Enciña da Lastra, en Rubiá, co fin de dar a coñecer os últimos avances acadados na investigación sobre os achados da Cova do Santo, unha cavidade calcaria localizada en Pardollán, en pleno corazón deste espazo protexido.
No ano 2025, un equipo de investigación da Área de Prehistoria da Universidade de Santiago de Compostela (USC), co apoio do persoal do Parque Natural da Serra da Enciña da Lastra, retomou os traballos neste enclave, levando a cabo a primeira escavación arqueolóxica sistemática co obxectivo de caracterizar os restos atopados e afondar no coñecemento deste importante xacemento.
Neste sentido, cómpre sinalar que a Cova do Santo está considerada o xacemento da Idade do Bronce con maior número de restos humanos documentados en Galicia, de aí a importancia de dar a coñecer os principais resultados obtidos no marco destes traballos así como as liñas de investigación actualmente en desenvolvemento.
A actividade, que se celebrará o 20 de xuño ás 11 horas e será impartida por Diego Lombao e José Rabuñal, do Centro de Investigación Interuniversitario das Paisaxes Atlánticas Culturais, está aberta ao público en xeral ata completar a capacidade da sala, sendo de especial interese para a veciñanza do ámbito do Parque Natural. Para obter máis información, os interesados poden contactar a través do seguinte correo electrónico: servicio.conservacion.natureza.ourense@xunta.gal.
Esta iniciativa enmárcase no programa de divulgación científica nos parques naturais de Galicia, promovido pola Consellería de Medio Ambiente e Cambio Climático no marco das actividades de uso público destes espazos protexidos, co fin de dar a coñecer entre a cidadanía os proxectos de investigación que desenvolven tanto a Consellería como as universidades e centros de investigación galegos dentro destes espazos protexidos.
