Podemos Lobios vén de presentar unha iniciativa no Congreso a través do deputado de Podemos Galicia, Antón Gómez Reino, para activar mecanismos que melloren a coordinación transfronteiriza.
Podemos Lobios vén de presentar unha iniciativa para coñecer o detalle da coordinación transfronteiriza durante os recentes lumes que afectaron ao Parque Natural Baixa Limia-Serra do Xurés. A formación lamenta o papel de pasividade da Xunta que está sendo o principal obstáculo para a preservación da zona.
“A Xunta de Galicia está sendo o principal obstáculo na conservación do Xurés”, sinala Carlos Garrido, candidato á alcaldía de Podemos Lobios, quen lamenta que “o Plan de Xestión será papel mollado mentres continúe o desleixo da Xunta, tal e como se demostra cos últimos lumes”.
Carlos Garrido considera que “é fundamental a colaboración das administracións”, para conter os lumes que se orixinen a un e outro lado da fronteira. Nese senso, o candidato á alcaldía vén de impulsar unha iniciativa no Congreso, da man do deputado Antón Gómez Reino, co fin de coñecer como funcionou esta coordinación durante estes últimos lumes.
Apunta Garrido que “moitos dos lumes no Xurés teñen memoria e repiten superficies afectadas. Para que a colaboración transfronteiriza funcione é preciso que medio rural e medio ambiente teñan as infraestruturas e as pistas limpas para facilitar a extinción eficaz dos lumes”. Algo que, asegura o candidato a alcaldía de Podemos, “non está pasando”. Ademais, insta á Xunta a que os servizos de prevención estean activos todo o ano, “tal e como demostran estes lumes en febreiro” e alude á proposta presentada pola súa formación en agosto como “a liña a seguir”.
