Desde Podemos Ourense denuncian unha vez máis a incompetencia e mala xestión do alcalde Gonzalo Pérez Jácome. A recente anulación da concesión do servizo de limpeza e recollida de lixo, valorada en 160 millóns de euros, é a última mostra dun goberno caótico e irresponsable. A súa incapacidade para elaborar un contrato en condicións provoca agora que Ourense siga cun servizo en precario, afectando tanto á calidade da limpeza como ás condicións laborais dos traballadores.
O noso voceiro municipal, Francisco Diéguez, advertiu que ‘’Esta situación non é un feito illado, senón unha consecuencia máis da falta de planificación e transparencia do goberno municipal. A falla de políticas serias en materia de contratación pública está a converter Ourense nun exemplo de desgoberno e improvisación. Desde Podemos Ourense consideramos inaceptable que a cidadanía teña que pagar as consecuencias das neglixencias de Jácome e do seu equipo.’’
Como partido de referencia na defensa dos servizos públicos, propoñemos medidas urxentes para solucionar este problema:
1. Un novo contrato transparente e xusto, que garanta condicións laborais dignas, a inclusión social e unha mellora efectiva da calidade do servizo.
2. Explorar a municipalización do servizo, para evitar novas irregularidades e asegurar que os recursos públicos se empreguen con eficacia e responsabilidade.
3. Planificación rigorosa na contratación pública, co obxectivo de evitar situacións de incerteza e garantir que os servizos municipais se xestionen con responsabilidade.
O goberno de Jácome está a demostrar, unha e outra vez, que non está á altura das necesidades de Ourense.
