Un acto ecuménico na parroquia de Pío X en homenaxe ao falecido George Ofilant, no que estivo presente a ampla familia das Xornadas, marcou hoxe o inicio da xornada. O programa proseguirá pola noite en Trives e Allariz, onde as agrupacións folclóricas amosarán con música e baile parte da historia do mundo
Un emotivo e sinxelo acto ecuménico na parroquia de Pío X en lembranza de George Orfilant, director da agrupación Sudafricana falecido en Ourense, foi o inicio inusual deste quinto día das Xornadas, no que estiveron presentes todos os participantes nas mesmas. Á noite, o folclore dos seis países deslumbrará de novo ao público que acuda a disfrutar do espectáculo en Trives e Allariz, a partir das 22,30 horas.
Mañá, 12 de agosto: Maceda e Viana do Bolo
A provincia segue acollendo con cheos de público as actuacións destas XXXVIII Xornadas de Folclore de Ourense, organizadas pola Deputación de Ourense a través do Centro de Cultura Popular Xaquín Lorenzo. Mañá, as agrupacións viaxaran ata Maceda e Viana do Bolo.
Ecuador, Sudáfrica e Arxentina despregarán a historia que se conta con música e danza en Maceda. O grupo Folklórico Tungurahua (Ecuador), chamado como “Danza que estremece o ceo” e fundado por Carlos Quinde, cumpre 53 anos de traxectoria e ten acollido neste tempo cerca dun millar de integrantes. Tungurahua amosa a cultura e a tradición do home e a muller tungurahuense e ambateña.
Os sudafricanos de Amezebra, segundos en subir ao escenario, son membros dunha organización nacional, a Asociación Sudafricana de Festas Tradicionais e a súa agrupación naceu nunha data simbólica: 1994, ano en que Nelson Mandela foi nomeado presidente do país. Composto por máis de trinta artistas, Amezebra ofrece oportunidades aos mozos que buscan artes creativas.
Dende Arxentina chega o Ballet Folklórico Latinoamericano “Santiago del Estero”, Bafolse, que subirá o último ao escenario de Maceda. O obxetivo que persigue dende a súa fundación no ano 1987 é difundir as expresións populares danzantes de Latinoamérica, coas bases de formación disciplinar, produción artística e proxección á comunidade. A cita será mañá, día 12 de agosto, ás 22,30 horas, na Praza das Toldas de Maceda.
As agrupacións procedentes de Bolivia, Tahití e Ucraína invadirán de cor e forza Viana do Bolo, amosando lendas e tradicións dos seus países que se transmitiron xeración tras xeración mediante a danza e a música. Será ás 22,30 horas, na Explanada do Pavillón, en Viana do Bolo.
