• Ante a coincidencia de posturas sobre o escenario municipal ourensán, Cabezas optou por propoñer mediante convocatoria pública unha reunión que, entende, “non podiamos pospoñer por máis tempo, porque a maioría dos ourensáns así nolo reclaman”
• Se PP, PSOE e BNG “demostramos a nosa capacidade de entendemento, asinando documentos de apoio a colectivos agredidos que agora nos demandan un acordo, por que entón non podemos buscar conxuntamente unha solución para Ourense”, pregúntase o candidato popular
• A situación de Ourense non é similar á do resto de Galicia, polo que en ningún caso a cidade pode entrar na estratexia xeral de pactos: “En Ourense danse circunstancias extraordinarias que necesitan solucións extraordinarias”
• Manuel Cabezas tentará unha nova reunión para a próxima semana e afirma que non busca protagonismo: “Se lles supón un problema que sexa eu quen lles convoque, que me citen eles a min, pero sentémonos a falar”
O candidato á alcaldía de Ourense polo Partido Popular, Manuel Cabezas, reitera a súa disposición ao diálogo para explorar posibles vías #de acordo con PSOE e BNG, que permitan ofrecer unha alternativa de goberno que poña fin á situación vivida no Concello de Ourense durante os últimos anos.
Manuel Cabezas fai este novo chamamento ao diálogo tras a negativa de socialistas e nacionalistas a reunirse co candidato popular. “Se de verdade Ourense vive unha situación de emerxencia, tan difícil é sentar a falar?”, lamenta Cabezas tras a falta de resposta á súa invitación.
Ante a coincidencia de posturas entre PP, PSOE e BNG sobre o escenario municipal ourensán, expresadas antes e durante toda a campaña electoral, Manuel Cabezas optou por propoñer mediante convocatoria pública unha reunión que, entende, “non podiamos pospoñer por máis tempo, porque a maioría dos ourensáns así nolo reclaman, pedindo que nos sentemos a dialogar e buscar alternativas”.
A convocatoria de onte, engade Cabezas, “é unha chamada á cordura, a ser consecuentes co afirmado durante todo este proceso electoral”. Se PP, PSOE e BNG “demostramos #ante os ourensáns a nosa capacidade de entendemento, asinando documentos de apoio a colectivos agredidos que agora nos demandan un acordo, por que entón non buscar conxuntamente unha solución para Ourense, á marxe de estratexias e coalicións”.
A situación de Ourense non é similar á do resto de concellos de Galicia, destaca o candidato popular, polo que en ningún caso a cidade pode entrar na estratexia xeral de pactos: “En Ourense danse circunstancias extraordinarias que necesitan solucións extraordinarias”.
CABEZAS PROPÓN UNHA NOVA REUNIÓN A PRÓXIMA SEMANA
Manuel Cabezas non claudica no seu empeño: “Dixen que buscaría un acordo con PSOE e BNG para que non se volva a repetir a anomalía política sufrida no Concello nestes últimos anos e así o manteño”.
Neste sentido anuncia que a próxima semana volverá tentar unha nova reunión a tres bandas, subliñando que “non busco ningún protagonismo á hora de establecer un diálogo entre todos”. Así, convida a PSOE e BNG a que “se lles supón un problema que sexa eu quen lles convoque, que me citen eles a min, pero sentémonos a falar”.