Esta concellería lembra que carece de responsabilidade sobre a seguridade das instalacións e da contorna do río
Visto o último suceso do pasado martes, día 5 de xullo de 2022, relacionado co afogamento e falecemento dun mozo nunha praia fluvial do río Miño en Ourense, en concreto nas inmediacións das instalacións da central hidroeléctrica de Velle, esta Concellería de Seguridade Cidadá lembra que carece de responsabilidade algunha sobre as mesmas, non sendo a seguridade das instalacións e da contorna do río competencia municipal.
Por iso, proximamente, desde esta Concellería instarase a que aquelas administracións, organismos e empresas responsables das mesmas procedan a instalar carteis preventivos en toda a zona, contrólese e limítese o acceso chegando a instalar barreiras físicas e proceder, se é necesario, a retirar os pantaláns o máis axiña que lle sexa posible, co fin de evitar máis desgrazas.
Ante as declaracións vertidas nalgúns medios informamos, que contrario ao publicado, o tempo de resposta e o operativo ante este desafortunado acontecemento tanto por parte da Policía Local como por parte do Corpo de Bombeiros foi encomiable, como ben quedaron rexistrados nos servizos informáticos de emerxencias e nos diferentes informes.
