Delega por 2 días as súas funcións no tenente de alcalde Armando Ojea
Armando Ojea será alcalde en funcións do Concello de Ourense mañá, mércores día 20, e pasado mañá, xoves día 21 de outubro. O alcalde, Gonzalo Pérez Jácome, delegará as súas funcións no tenente de alcalde durante estas dúas xornadas nas que se desprazará á localidade catalá de Lleida para asistir á feira internacional de equipamentos e servizos municipais, Municipalia. A finalidade desta visita é coñecer de primeira man as últimas novidades do sector coa finalidade de mellorar a dotación de recursos de diferentes servizos municipais. Tamén por este motivo, a sesión ordinaria da xunta de goberno local, que habitualmente se celebra os xoves, terá lugar esta semana o venres, 22 de outubro, mantendo o seu horario habitual, as 08.30h.
Municipalia, Feira internacional de equipamentos e servizos municipais, é un evento que se desenvolve desde o día 19 ao 21 de outubro cunha ampla participación de compañías referentes do sector, empresas innovadoras e gran variedade de xornadas técnicas. O seu obxectivo, explica a organización, é “achegar solucións para optimizar a xestión municipal, con propostas pioneiras e sostibles para o progreso das cidades e para a rendibilidade dos investimentos. A mostra reúne 300 expositores cunha superficie total de exhibición de 21.500 metros cadrados e un programa que inclúe máis de 40 actividades paralelas.
O alcalde acudirá á feira acompañado de persoal funcionario, xefe de Servizo de Medio Ambiente e dúas persoas do seu gabinete.