O alcalde de Ourense, Gonzalo Pérez Jácome, recibiu esta mañá no salón de plenos a José Manuel González Cuevas, gobernador do distrito 2201 de Rotary en España e a Maricruz Fernández, presidenta de Rotary Ourense.
O rexedor e os representantes desta entidade social sen ánimo de lucro analizaron as diferentes vías de colaboración que manteñen ambas institucións na cidade.
Ao remate do encontro, o gobernador de distrito 2021 de Rotary destacou a importancia de traballar conxuntamente: “a miña misión é percorrer todos os clubs do meu distrito, que son 74 por toda España, e estreitar os lazos co mundo institucional”, manifestou González Cuevas, quen lembrou os lemas da organización: “ Unidos para facer o ben e Dar de si antes de pensar en si”. Rotary, explicou, agrupa 1.300.000 persoas en todo o mundo, co obxectivo de “axudar á xente necesitada”.
Pérez Jácome asegurou que “é unha honra recibir esta visita no Concello”, lembrou diferentes proxectos desenvolvidos na cidade nos que colaboraron as dúas entidades, entre os que destacou as campañas de apoio á poboación de Ucraína e ás persoas afectadas polos terremotos de Siria e Turquía. “Seguiremos colaborando con eles”, aseverou.
