O proxecto pretende acreditar a comunidade autónoma como unhas das rexións con maior esperanza de vida do mundo
O Concello colabora con esta iniciativa e co congreso internacional de lonxevidade que se desenvolverá no mes de maio na cidade
O alcalde de Ourense, Gonzalo Pérez Jácome recibiu esta mañá no Concello o demógrafo Michel Poulain, a súa colaboradora Ana Canelada, o presidente, José María Faílde, e a secretaria, María Dapía, da Sociedade Galega de Xerontoloxía e Xeriatría. Polain, un dos maiores expertos a nivel mundial na lonxevidade da poboación, visita a cidade no marco do proxecto Galicia Blue Zone, promovido pola Xunta de Galicia, a Sociedade Galega de Xerontoloxía e Xeriatría e a Universidade de Vigo. Esta é unha iniciativa que ten como obxectivo que Galicia se converta na primeira rexión española, e na sexta do mundo, en contar cunha Blue Zone (Zona Azul), a distinción que un comité científico internacional outorga aos territorios con maior esperanza de vida.
Nunha primeira fase dos traballos, o grupo de investigación detectou 66 zonas de extrema lonxevidade en Galicia, entre as que se atopa Ourense, un municipio que ademais presenta a particularidade de tratarse dunha zona urbana, cando esta clase de zonas adoitan ser rurais.
Galicia, segundo os datos do padrón de habitantes, tiña no ano 2022 un total de 2.039 persoas centenarias, o que equivale a unha taxa de 75,79 persoas centenarias por cada 100.000 habitantes. Estas cifras convértena nunha das comunidades autónomas con maior concentración de persoas que supera os 100 anos. Ademais, hai rexións no interior galego con taxas que se atopan entre as máis elevadas a nivel mundial, similares ou superiores aos rexistrados nas denominadas blue zones. Ata o momento, foron documentadas cientificamente como zonas azuis a illa de Okinawa en Xapón, Martinica (Francia), a illa de Ikaria en Grecia, a zona montañosa da illa de Sardeña en Italia e a península de Nicoya en Costa Rica).
O Concello colabora con este proxecto e achegará ao grupo de investigación información estatística sobre a lonxevidade en Ourense. O Concello tamén colaborará no congreso internacional de xeriatría e xerontoloxía que se desenvolverá na cidade no mes de maio.
