Trátase dos programas de envellecemento activo, e de actividades para adultos e infantís nos centros cívicos
O Concello de Ourense abriu a convocatoria para a selección de proxectos de cursos e actividades na área de Asuntos Sociais. Concretamente, trátase dos programas de envellecemento activo, e de actividades para adultos e infantís nos centros cívicos.
No programa de envellecemento activo, as actividades irán encamiñadas ao desfrute do ocio e do tempo libre das persoas maiores de 60 anos, como exercicio físico, mantemento e deportivas, artísticas, cognitivas, de estimulación da memoria e informáticas, entre outras. Procurarán, na medida do posible, o tratamento transversal con outros temas, tales coma os relacionados con valores sociais, e de fomento e coidado da saúde.
No caso das actividades dos centros cívicos, estas bases teñen por obxecto fixar os criterios e requisitos par a selección de proxectos que configuren a oferta do Programa de actividades para o período 2022-2023. Por unha banda, en particular, ofrecer alternativas de ocio e tempo libre potenciando as habilidades e as capacidades das persoas e elaborar programas de carácter cultural e social que teñan como obxecto o desenvolvemento integral dos veciños e veciñas. E pola outra, proxectos dirixidos para nenos e nenas de Educación Infantil e Primaria, actividades de apoio escolar para nenas e nenos de 5º e 6º de Educación Primaria e 1º e 2º de ESO. O prazo de presentación destes proxectos será ata 5 de xullo.
