O Concello de Ourense acenderá este xoves, día 5 de decembro, a iluminación de Nadal da cidade, nun acto que terá lugar na rúa do Progreso, á altura da Alameda. Comezará cunha actuación musical, desde as 19.00 até as 19.55 horas. Ás 20.00 horas acenderanse as luces de Nadal e de seguido, continuará a música, até as 21.00 h.
O acendido das luces dará inicio a unha ampla programación de actividades organizadas polo Concello de Ourense para celebrar o Nadal 2024
O dispositivo de seguridade para o desenvolvemento da actividade prevé pechar ao tráfico rodado desde as 15.00 horas un treito da rúa do Progreso, desde a baixada á Praza de Abastos até a rotonda de San Rosendo, deixando subir os vehículos pola rúa Parada Justel até as 18.00h (cando se pechará tamén esta rúa).
O acceso peonil por parte do público deberá realizarse desde a rúa do Progreso, xa que o paso desde Lamas Carvajal cara á zona a Praza Maior estará pechado por motivos de organización, desde as 18.00 horas, até que remate o evento.
