Tamén licitará a concesión das instalacións de cafetería da Alameda
A Xunta de Goberno Local do Concello de Ourense aprobará na súa sesión de mañá, xoves, o expediente para contratar as obras do proxecto de restauración da pasarela de Outariz. A actuación ten un orzamento de licitación de 1.646.952,04 euros, IVE engadido, e adxudicarase por procedemento aberto. Na mesma reunión, prevé aprobar tamén o expediente para adxudicar a concesión demanial para a explotación das instalacións destinadas a cafetería do Parque da Alameda. Será por procedemento aberto, por un prazo inicial de 10 anos e un canon anual de 71.842,08 euros, IVE incluído.
A sesión ordinaria desta semana da Xunta de Goberno inclúe 38 propostas de acordo na súa orde do día.
Licenzas (7). Dará conta de 3 solicitudes de licenzas: para o acondicionamento de baixos para troco de uso a vivenda nun edificio na rúa Río Navea; para a reforma de cuberta, fachadas e instalación de ascensor nun edificio na Avenida de Buenos Aires, e para a construción dunha vivenda unifamiliar no Lugar do Lagar -Vilar de Astrés.
Tamén dará conta das solicitudes de prórroga para o inicio das obras de instalación de ascensor nun edificio na rúa Río Salas; de troco da titularidade dunha licenza de obra e do título habilitante de natureza urbanística para o proxecto básico e de execución de edificio para apartamentos turísticos. Tamén dará conta dunha renuncia da licenza de construción para a execución de muro de contención en dúas parcelas de Barrocás.
Aperturas (2). Dúas solicitudes: de licenza de obra para a reforma dun local para restaurante na rúa Alejandro Outeiriño e de título habilitante de natureza urbanística para licenza de gasolineira, taller mecánico e lavado de vehículos na rúa Seixalbo.
Patrimonio (4). Catro reclamacións de responsabilidade patrimonial.
Contratación (3). Tres expedientes:
· Prórroga do contrato do servizo de mantemento do software de bases de datos Oracle do Concello.
· Expediente para contratar as obras do “proxecto de execución para obra de restauración de pasarela sobre o río Miño en Outariz”
· Expediente para adxudicar, mediante procedemento aberto, a concesión demanial para a explotación das instalacións destinadas a cafetería sitas no Parque da Alameda.
Artes e festexos (1). Rectificar un acordo dunha xunta de goberno anterior.
Asuntos sociais (2). Dous expedientes:
· Convenio de colaboración entre o Concello e a Asociación de persoas con discapacidade ADO, para o proxecto “Fomento e desenvolvemento da autonomía e da formación integral para persoas con discapacidade intelectual”.
· Convalidación de gasto para a concesión de subvencións para libros de texto e material escolar.
Xestión económica e orzamentaria (1). Aprobar unha relación de facturas correspondentes a gastos realizados no exercicio 2024 que non puideron seguir a tramitación ordinaria para a súa aprobación no devandito exercicio.
Avogacía consistorial (18). Dará conta de dúas sentenzas ditadas polo Tribunal Superior de Xustiza de Galicia; dunha sentenza e un auto do Xulgado do Contencioso-Administrativo número 1, dun auto do número 2, dun decreto do Xulgado do Social número 1 e dunha providencia do Xulgado do Penal número 2. Ademais, o Concello deberá comparecer en 10 procedementos xudiciais, diante dos xulgados do Contencioso- Administrativo número 1 e 2 de Ourense, do número 1 de Vigo e do Xulgado de Instrución número 1 de Ourense.
