— O vicepresidente primeiro e conselleiro de Economía, Industria e Innovación, Francisco Conde, visitou esta mañá o polígono de Tamallancos que realizou melloras na xestión de residuos e na seguridade
— Xa está aberto ata o 2 de febreiro o prazo da nova convocatoria dos apoios para a mellora destas infraestruturas
O vicepresidente primeiro e conselleiro de Economía, Industria e Innovación, Francisco Conde, visitou esta mañá o polígono de Tamallancos en Vilamarín (Ourense) para comprobar as obras de mellora realizadas nos últimos anos e que mobilizan 1,15M€ grazas ás axudas da Xunta. As dúas últimas actuacións foron a mellora de xestión de residuos, así como actuacións en materia de seguridade no acceso ao parque empresarial.
Estas obras enmárcanse na liña de axudas da Administración galega para impulsar a modernización de instalacións e servizos nos polígonos galegos co obxectivo de facelos máis competitivos e favorecer a implantación de novas empresas. Así, desde 2016 xa se executaron 17M€ en apoios.
Tal e como explicou Conde, a Vicepresidencia primeira e Consellería de Economía, Industria e Innovación, ten aberto o prazo, ata o 2 de febreiro, da nova convocatoria desta liña de apoios á que destina 2,1M€. Son de concorrencia competitiva e están dirixidos aos concellos galegos que queiran realizar melloras relativas á implantación de iluminación pública eficiente, plantas de depuración de auga, xestión de residuos, infraestruturas viarias, instalación de sistemas de seguridade, contraincendios e contra o roubo de cable, e servizos centralizados de subministración de gas e hidróxeno verde.
As axudas poderán alcanzar os 120.000 euros por proxecto ou 138.000 no caso dunha solicitude conxunta de varios concellos -cada municipio poderá presentar dúas solicitudes de apoio-. Xunto con estas axudas seguirase avanzando na posta en marcha de viveiros industriais e no reforzo e extensión de redes de distribución eléctrica. Conde lembrou que na selección de proxectos seguirase tendo en conta se se trata dun Concello Emprendedor, como no caso de Vilamarín.
