Durante a folga haberá un vehículo en servizo en todas as franxas horarias por cada unha das liñas
O primeiro e o último horario dos servizos realizaranse completos.
O Concello de Ourense decretou os servizos mínimos e esenciais do servizo público de transporte colectivo de viaxeiros durante os paros que iniciarán os traballadores da empresa concesionaria a partir de mañá, venres 15 de xaneiro.
Durante a folga haberá un vehículo en servizo en todas as franxas horarias por cada unha das liñas: 1, 3, 6A, 6B, 7, 10, 11A, 13A, 14, 15, 18 e 22. Neste sentido, a liña 18 terá horario de domingo e abranguerá o traxecto da liña 9. E a liña 15 dará servizo de luns a sábado, asumíndose o traxecto desta liña os domingos e festivos pola liña 1.
No caso das liñas 4, 5, 11B e 21 deberá prestarse un servizo cada dúas horas en cada sentido do traxecto.
Ademais de garantir o primeiro e o último horario dos servizos, os traxectos dos servizos mínimos deben realizarse de forma completa.
O persoal administrativo e de mantemento prestará servizo co 50 % dos seus efectivos.
Esta resolución foille comunicada á empresa concesionaria para que esta designe os traballadores que deberán prestar os servizos mínimos, dando preferencia, no seu caso, a aqueles que manifestasen a súa vontade de non exercer o dereito de folga.
