O Concello de Ourense non acudirá finalmente á axuda parcial convocada polo goberno central para reducir o custo dos billetes de autobús urbano. Así o avanzou o alcalde de Ourense, Gonzalo Pérez Jácome, quen explica que o goberno municipal toma esta decisión por varios motivos. Por unha banda, modificar as tarifas do servizo requiriría a aprobación dunha modificación da ordenanza municipal, o que conleva uns prazos de tramitación que farían que os novos prezos non entrarían en vigor antes do mes de decembro. Dado que as subvencións que outorga o Estado serían para o período de setembro a xaneiro, na práctica a redución das tarifas só sería efectiva durante apenas un mes.
Neste escenario, o goberno municipal advirte que podería ser contraproducente no mes de xaneiro aplicar en decembro baixadas do billete de autobús que só terían un mes de duración.
Explica Gonzalo Jácome que “se se reducen as tarifas en decembro e isto produce unha suba do billete no mes de xaneiro, podería ser un desincentivo á utilización do servizo municipal de autobuses urbanos”, cando “o que buscamos desde o Concello de Ourense é todo o contrario: que máis xente utilice o servizo público de transporte”.
Lembra tamén o alcalde que o custo dos billetes dos autobuses urbanos do Concello de Ourense son dos máis baixos de toda España”, cun prezo de 0,85 céntimos.
