- Están dirixidas a nenos e nenas nados entre o 2011 e 2019, e desenvolveranse de luns a venres entre as 8.00 e as 14.30 horas
- Para anotarse haberá que inscribirse no espazo web da Concellería de Educación desde o mércores, día 7, até o domingo 11 de xuño.
O Concello de Ourense, a través da Concellería de Educación, organizará actividades de verán para escolares durante os meses de xullo e agosto para axudar á conciliación das familias ourensás. O prazo de inscrición estará aberto desde o vindeiro mércores, día 7, até o domingo 11 de xuño.
O programa ‘Concilia Verán 2023’ vai dirixido a nenos e nenas censados no Concello de Ourense nados entre os anos 2011 e 2019, e desenvolverase por quincenas -do 3 ao 14 e do 17 ao 31 de xullo, e do 1 ao 14 e do 16 ao 31 de agosto- en 10 espazos municipais: os CEIP O Couto, Manuel Luís Acuña, Vistahermosa, Irmáns Villar, Amadeo Rodríguez Barroso, Covadonga, A Ponte, As Mercedes e Mestre Vide, e na Aula da Natureza do río Miño.
Este programa municipal quere ofrecerlles ás familias un espazo de lecer durante os meses de verán con actividades que fomentarán os hábitos de vida saudables, actitudes solidarias e de convivencia e o respecto polo medio ambiente. Ademais, haberá atención para o alumnado con necesidades específicas de apoio educativo e reforzo de materias lectivas.
A inscrición farase exclusivamente por Internet a través do espazo web da Concellería de Educación -www.educacionourense.es- desde as 9.00 horas deste vindeiro mércores, día 7, até a media noite do domingo 11 de xuño. A listaxe provisional de nenos e nenas admitidas publicarase o 15 de xuño, cando se abrirá un novo prazo de cinco días para formalizar as prazas, pagar as traxas correspondentes e achegar a documentación requirida.
Toda a información sobre prazos, espazos, documentación e taxas públicas está dispoñible neste documento (.pdf)
