O alcalde de Ourense, Gonzalo Pérez Jácome, e o concelleiro de Deportes, Aníbal Pereira, entregaron esta mañá os premios aos centros educativos da cidade pola participación do seu alumnado na edición número 48 da Carreira Pedestre Popular do San Martiño, que se desenvolveu o pasado día 9 de novembro. Alcalde e concelleiro agradeceron a implicación dos centros nesta actividade, que volveu contar cunha altísima participación en todas as súas categorías.
De acordo coas bases da proba, o Concello concédelles un premio de 120 euros en material deportivo a todos os colexios e institutos que presentaron un mínimo de 25 deportistas clasificados/as. Ademais, os 6 centros de Primaria e os 6 de Secundaria que rexistraron unha maior participación recibiron premios en material deportivo por importe de entre 300 e 100 euros.
Nas categorías Sub12 e Sub10, participaron 28 centros educativos, dos que 21 clasificaron máis de 25 deportistas. O que máis achegou foi o CPR María Auxiliadora Salesianos (125), seguido de Carmelitas (124), CEIP Prácticas (84), CEIP Mestre Vide (84), CEIP A Ponte (79) e CEIP O Couto (71).
Nas categorías Sub18, Sub16 e Sub14, estiveron representados 25 centros, dos que 19 clasificaron 25 ou más deportistas. O que tivo unha maior participación foi o IES As Lagoas (226), seguido do IES O Couto (170), Colexio Divina Pastora (170), IES Blanco Amor (160), IES Otero Pedrayo (146) e IES Ferro Couselo (104).
