A Deputación colabora na xestión deste reforzo de voluntarios, que terán a súa zona de descanso e o avituallamento necesario nos parques comarcais
O primeiro convoi de axuda, 10 profesionais procedentes de Fuengirola (Málaga), chegou onte á noite ao parque de bombeiros de A Rúa
O Consorcio Provincial agradece os “numerosos ofrecementos” de profesionais que se están a producir desde toda España
No contexto da loita contra os lumes forestais, o Consorcio Provincial de Ourense para o servizo contra incendios, traballa na xestión da chegada de bombeiros doutras provincias que se ofreceron a vir á provincia de Ourense par colaborar na extinción dos incendios forestais.
Todos estes medios están tramitados a través do posto do Centro de Coordinación Operativa Integrado (Cecopi) e da Xunta de Galicia, no que a Deputación ten presencia técnica tanto dende o Consorcio como dende a propia institución. A coordinación e o diálogo coa Asociación Profesional de Técnicos de Bomberos (APTB), a través do seu presidente Carlos García Touriñán -director de seguridade cidadá no Concello de A Coruña-, foi clave para acadar este reforzo de medios que chega á provincia.
O primeiro convoi, procedente de Fuengirola (Málaga), está composto por 10 bombeiros que xa se instalaron este luns á noite no parque de bombeiros de A Rúa, que cobre a zona de Valdeorras.
No mesmo dispositivo, viaxaron outros seis efectivos que se quedarán na base de Verín e que onte xa iniciaron a súa cooperación na loita contra o lume, actuando no incendio declarado en A Gudiña.
Hoxe chegarán tamén 17 bombeiros procedentes de Cádiz que, previsiblemente, se aloxarán no parque de Xinzo.
A estes efectivos, súmanse seis profesionais de Bombeiros sen fronteiras, que saíron esta mañá dende Madrid.
Colaboración de Cruz Vermella
Os parques comarcais están preparados con catres, mantas e outros útiles necesarios para o aloxamento dos efectivos, grazas á colaboración de Cruz Vermella e a xestión do avituallamento e as zonas de descanso do Consorcio, habilitando os parques comarcais para este cometido.
En total, son 39 os bombeiros voluntarios que chegan cos seus medios e vehículos dende outras provincias e que estarán a prestar a súa axuda en Ourense na loita contra o lume.
O Consorcio Provincial traballa na xestión deste reforzo relevante para os efectivos ourensáns que traballan sobre o terreo e agradece os “numerosos ofrecementos” que se están a producir por parte de profesionais de diferentes puntos de España.
