O goberno municipal do Concello de Ourense aprobará mañá, venres, en Xunta de Goberno Local o plan de estabilización de emprego temporal, mantendo os criterios de desempate previamente establecidos.
Así o avanzou este mediodía o alcalde de Ourense, Gonzalo Pérez Jácome, quen explica que “onte habilitamos 20 millóns de euros grazas á abstención do PP, tras unha negociación. Atendemos á súa esixencia de manter, no proceso de estabilización de empregados públicos temporais, o criterio de desempate que beneficiaría ao traballador que fose deste concello”.
Advirte Pérez Jácome que “dos 104 traballadores que estabilizarán, estimamos que tan só ao redor dun 5-10%, 5-10 persoas, poderían verse afectados polo feito de que funcionarios doutras administracións con máis 17 anos de antigüidade computasen máis méritos”.
Asegura o rexedor que “nós prefeririamos outro criterio de desempate, pero aceptamos por un ben superior, neste caso desbloquear a xestión do Concello con eses 20 millóns €. Á fin e ao cabo, ata podería darse o caso de que ningún funcionario doutras administracións quixese trasladarse ao Concello, co cal, o cambio seria irrelevante”, conclúe o alcalde.
