O Concello de Ourense colabora coa Federación Galega na organización desta cita que terá lugar esta semana na cidade.
O Concello de Ourense e a Federación Galega de Hóckey informan da celebración de varios encontros da Selección Española de Hóckey Sala no Anexo do Pavillón dos Remedios. A cidade foi escollida como sede para estas xornadas de traballo do combinado nacional, que preparará o europeo de Heidelberg (do 8 ao 11 de xaneiro) no Torneo IV Nacións de Ourense.
A colaboración entre o Concello e a Federación permite que a Selección se desprace a Ourense para disputar unha serie de partidos. Ademais, o domingo 28, os máis pequenos poderán desfrutar dun clinic gratuíto cos xogadores da selección tras o seu primeiro encontro, unha actividade para iniciarse no hóckey sala e compartir a experiencia cos deportistas.
Horarios dos partidos en Ourense:
Domingo, 28 de decembro
- 11:00 – ESPAÑA vs ITALIA
- 12:00 – Clinic gratuíto coa Selección Española para nenos e nenas
- 14:00 – PORTUGAL vs SUÍZA
Luns, 29 de decembro
- 11:00 – ESPAÑA vs SUÍZA
- 12:30 – ITALIA vs PORTUGAL
- 17:30 – SUÍZA vs ITALIA
- 19:00 – PORTUGAL vs ESPAÑA
Martes, 30 de decembro
- 9:00 – Partido polo 3.º e 4.º posto
- 11:00 – Final do torneo
- 12:10 – Entrega de premios
Dende a Concellería de Deportes sinálase que a cesión das instalacións dos Remedios responde ao obxectivo de apoiar o traballo das federacións e ofrecerlle á veciñanza a posibilidade de ver hóckey de nivel nacional sen saír da cidade. Pola súa banda, a Federación Galega destaca a boa disposición do Concello para coordinar os aspectos loxísticos necesarios para que o equipo estatal poida desenvolver a súa actividade en Ourense.
