O pantalán de Arnoia acolleu a presentación das embarcacións, unha actuación encadrada no Plan de Sustentabilidade Turística en “Ourense Termal” e que prevé a incorporación de dúas unidades máis para a provincia o próximo ano
A xerente do Plan de Sustentabilidade Turística en “Ourense Termal”, Emma González, explicou que a diferenciación da oferta é un dos aspectos máis destacados, “planificando roteiros complementarios desde os balnearios para que o turista poida visitar as vilas das comarcas”
Os ecobarcos, con capacidade máxima de oito prazas e accesibilidade para persoas con mobilidade reducida, contan con propulsión eléctrica que evita a emisión de contaminantes, ruído e ondas, protexendo as beiras dos ríos polos que se navega e respectando a práctica do remo
O presidente da Deputación, Manuel Baltar, presentou esta mañá en Arnoia os dous novos ecobarcos adquiridos polo goberno provincial para o seu uso turístico na comarca do Ribeiro -o “Treixadura”, entre os encoros de Castrelo e Frieira- e no Xurés -o “Clamadoira”, no encoro de As Cunchas-. Unha actuación encadrada no Plan de Sustentabilidade Turística en “Ourense Termal” e que prevé a incorporación de dúas novas embarcacións para a provincia o próximo ano.
“Esta é unha forma máis de entender o termalismo”, dixo Manuel Baltar, quen afirmou que os novos ecobarcos son “un fito máis para o desenvolvemento da provincia de Ourense e que nos diferencia como o territorio con maior potencial termal de Europa”. Unha acción, engadiu, “planificada desde a colaboración pública, de conformidade coas administracións central, autonómica e provincial”.
Manuel Baltar destacou que a partir da próxima primavera e ata o outono os ecobarcos do Ribeiro e As Cunchas ofrecerán ao visitante un servizo máis, “pero aínda virán máis iniciativas pois seguimos planificando novos eixos de desenvolvemento e actuacións que seguro serán un éxito, como o destas embarcacións”.
Xunto ao presidente da Deputación, no pantalán de Arnoia tamén se deron cita o representante da Axencia de Turismo de Galicia, Cecilio Santalices; a xerente do Plan de Sustentabilidade Turística en “Ourense Termal”, Emma González; o alcalde do municipio e vicepresidente da sección de vilas termais da FEMP, Rodrigo Aparicio; e o construtor das embarcacións, José Ballester. Como socia do Plan de Sustentabilidade Turística en “Ourense Termal”, xunto á Xunta e a Deputación, a Subdelegación do Goberno -membro da comisión por designación da Secretaría de Estado de Turismo- desculpou non poder asistir ao acto.
Para Emma González, a diferenciación da oferta é un dos aspectos máis destacados deste novo servizo, pois se están tramitando #ante a Confederación Hidrográfica Miño-Sil os correspondentes permisos para a instalación de pantaláns, “de modo que se poidan planificar roteiros complementarios desde os balnearios para que o turista poida visitar os recursos das comarcas”.
Os obxectivos específicos desta actuación son crear un sistema de mobilidade turística sostible, reforzando con iso o piar de sustentabilidade do Plan; o incremento das actividades complementarias á oferta termal; impulsar a ensamblaxe de produtos turísticos; e Incremento da estancia media no destino
Embarcacións sostibles
Os dous ecobarcos adquiridos pola Deputación de Ourense, construídos integramente en Galicia, están especialmente deseñados para destinos sostibles, explicou pola súa banda José Ballester. Cunha capacidade máxima de oito prazas e accesibilidade para persoas con mobilidade reducida, estas embarcacións contan con propulsión eléctrica, “o que evita a emisión de contaminantes á atmosfera e ruído, ademais de xerar pouca onda para protexer as beiras dos ríos polos que se navega e respectar a práctica do remo”.
Os asistentes ao “fam trip” participaron na viaxe cos ecobarcos
A presentación dos dous ecobarcos estivo enmarcada no “fam trip” que están a realizar estes días representantes de federacións deportivas de distintas disciplinas na parte de “sport trip” e a axencias asociadas a colexios médicos ou empresas de seguros e colectivos relacionados coa promoción da saúde, na parte de “medical trip”.
Os representantes institucionais participaron na viaxe en ecobarco xunto aos asistentes ao “fam trip”, que hoxe, no seu último día en Ourense, tamén coñeceron as instalacións do club náutico de Castrelo de Miño, visitaron o balneario de Arnoia e realizaron unha actividade en bicicleta eléctrica.
No marco do Plan de Sustentabilidade Turística “Ourense Termal”, unha das accións que se contemplan para a súa execución está destinada a crear “Redes Transversais de Información e Coñecemento: Prescritores estratéxicos para unha maior competitividade”. Por iso, esta acción pon o foco en dous sectores que se consideran estratéxicos para o desenvolvemento turístico provincia: o sanitario e o deportivo.
Este plan é froito dun convenio de colaboración entre a Deputación de Ourense, a Axencia de Turismo de Galicia e a Secretaría de Estado de Turismo, a través do cal, investiranse máis de 3 millóns de euros entre o 2022 ao 2024, para lograr a transformación competitiva dos 15 municipios rurais termais de Ourense.
