O Concello non recorrerá as resolucións para non demorar a adxudicación do contrato e volverá abrir prazo de presentación de ofertas a próxima semana, incluíndo xa as correccións indicadas polo Tribunal
O Tribunal Administrativo de Contratación Pública de Galicia esixiu pequenos cambios na licitación do servizo de transporte municipal de Ourense. En 2 resolucións, 178 e 179/2024, do 29 de novembro de 2024, en resposta a outros tantos recursos presentados por empresas interesadas, require o Concello modificar 3 cuestións moi concretas dos pregos de contratación.
O Concello de Ourense non recorrerá as resolucións para non demorar a licitación do contrato, segundo avanzou o goberno municipal, quen advirte que as correccións que se deberán realizar son “sinxelas”, e que “se volverá abrir prazo de presentación de ofertas a próxima semana, incluíndo xa correccións requiridas polo Tribunal”.
As 2 resolucións do tribunal requiren realizar 3 correccións concretas que afectan a:
a) Un erro de redacción en canto á localización da nave – cocheira, ao prever que, ademais de en Ourense, poida establecerse en “municipios limítrofes”. En consecuencia, deberá corrixirse o prego para incluír “municipios próximos”, mantendo o criterio do prego de que a nave estea a unha distancia máxima de 10 km. por estrada do límite do termo municipal.
b) Un erro consistente en non incluír no orzamento de gastos de persoal o incremento de custo de Seguridade Social derivado do mecanismo de equidade interxeracional.
c) Un erro na redacción da fórmula de valoración da oferta económica. Segundo o Tribunal, non deixaba claro se se puntuarían as diferenzas entre ofertas que se expresen en números decimais e non enteiros. Porén, cómpre destacar que o Tribunal non fai ningún reproche á fórmula de valoración, só pide que a redacción sexa máis clara.
Aínda que estas dúas resolucións poderían interpretarse como algo negativo, conteñen tamén dúas boas noticias, segundo manifesta o goberno municipal.
Por unha banda, explica que “os 2 recursos presentados cuestionaban 15 cuestións diferentes relativas aos pregos. O Tribunal rexéitaas todas, dándolle a razón ao Concello, excepto nesas 3 cuestións que se indicaron. En particular, os motivos máis graves – que dabamos un trato de favor á actual empresa prestadora do servizo ou que o orzamento era irreal – foron rotundamente rexeitados polo Tribunal, o que avala, no esencial, a corrección dos pregos (salvo eses pequenos erros)”.
A isto engade o goberno local que “a corrección dos erros indicados é sinxela, e realizarase polo Concello o máis axiña posible, abrindo un novo prazo de presentación de ofertas, se é posible xa a próxima semana. Deste xeito, a licitación – aínda que cun atraso que pode estimarse nun mes e pico – continuará adiante”, aseguran.
Por estes motivos, conclúe o goberno municipal que “aínda que o Concello tería a posibilidade de recorrer a decisión do Tribunal, que nos parece excesivamente rigorosa (xa que os erros indicados son discutibles e poderían salvarse por vía interpretativa) non o imos a facer, para non demorar máis a adxudicación do novo contrato, que esperamos permita continuar mellorando este servizo esencial para os cidadáns.”
