Superado este reto, que remata o 30 de abril, o Concello recibiría un premio de 2.000 euros para doar a unha causa social da cidade. Na última campaña recolléronse 3,47 quilos por habitante na cidade.
Mañá chegará o stand amarelo a Ourense á praza do Bispo Cesáreo con toda a información sobre o proxecto retomando a campaña de fomento da reciclaxe de envases de plástico latas e briks.
A Consellería de Medio Ambiente, Territorio e Vivenda en colaboración con Ecoembes, a organización ambiental sen ánimo de lucro que coordina a reciclaxe de envases en España, retoman en 15 concellos galegos a campaña de incentivo da reciclaxe “Únete ao reto”, logo de suspendela en 2020 por mor do confinamento.
Ourense é un dos concello que se suma este reto e mañá, venres, de 8.00 a 15.00 horas, terá instalado na praza do Bispo Cesáreo un colector amarelo onde figurará toda a información e poderán recollerse pequenos agasallos da campaña.
Unha mellora do 10% e un premio de 2.000 euros.
Este reto, convocado do 1 de febreiro ao 30 de abril, parte dunha premisa moi sinxela: os concellos participantes que melloren, cando menos, nun 10% a súa achega ao contedor amarelo (envases de plástico, latas e briks) respecto ao mesmo período do ano pasado, conseguirán un premio dotado con 2.000 euros que terán doar a unha causa social local da súa elección. Durante a última campaña, recolléronse 3,47 quilos de plástico por habitante. Haberá que superar, daquela, a cifra de 3,8 quilos por habitante.
Coa colaboración dos concellos para implicar á cidadanía
Para conseguir que os concellos superen o Reto, están programadas unha serie de accións de comunicación coas que preténdese comprometer aos concellos e á cidadanía na mellora das cifras de reciclado de envases de plástico, latas e briks, nos seus respectivos municipios.
É por isto que durante os 3 meses de duración do reto, desenvolveranse diferentes actividades de grande impacto e poder de comunicación como son a instalación de contedores amarelos xigantes e stands/colectores, a planificación de intensas campañas en medios de comunicación e redes sociais etc. que teñen como finalidade animar á cidadanía a participar á vez que se lles aprende como reciclar mellor.
En www.uneteaoreto.com atópase toda a información sobre como separar correctamente os residuos e será onde se publiquen os quilos recollidos cada mes de campaña en cada municipio.
Sobre Ecoembes. Ecoembes (www.ecoembes.com) é a entidade sen ánimo de lucro que xestiona a recuperación e a reciclaxe dos envases de plástico, as latas e os briks (contedor amarelo) e os envases de cartón e papel (contedor azul) en toda España.
En 2019, recicláronse máis de 1,5 millóns de toneladas de envases de plástico, latas e briks e envases de cartón en todo o territorio nacional. Grazas a esta porcentaxe, obtivéronse numerosos beneficios ambientais, como evitar a emisión de 1,67 millóns de toneladas de CO2 á atmosfera ou aforrar 6,36 millóns de MWh. Asemade, aforráronse 20,74 millóns de metros cúbicos de auga.
